Орал қаласында жасөспірімдер арасында Туризм және спорт министрлігі кубогының салтанатты ашылу рәсімі өтті. Республикалық деңгейдегі жарысқа еліміздің өңірлерінен келген спортшылар қатысуда.
Турнир аясында бокс, грек-рим күресі, еркін күрес, дзюдо және таэквондодан жарыстар өтеді. Бәсекеге облыстық және республикалық спорт мектеп-интернаттарының 17 командасы қатысып, өзара мықтыны анықтайды.
Салтанатты ашылу рәсіміне Батыс Қазақстан облысының дене шынықтыру және спорт басқармасының басшысы Бақдәулет Сәбитов, ҚР Туризм және спорт министрлігі Спорт және дене шынықтыру істері комитетінің Спорт резерві, әдістемелік қамтамасыз ету және ғылым басқармасының басшысы Ермек Қоспанов, сондай-ақ ауыр атлетикадан мемлекеттік жаттықтырушы, турнирдің бас төрешісі Асқар Қадиров қатысты.
Рәсім барысында Бақдәулет Маратұлы Сәбитов қатысушыларды Ақжайық өңірінде қарсы алып, жарыстың жас спортшылардың шеберлігін шыңдаудағы және спорттық тәжірибесін арттырудағы маңызын атап өтті.
«Бүгінгі жарыс – тек жеңімпазды анықтайтын дода ғана емес, болашақ чемпиондар шыңдалатын алаң. Осындай республикалық деңгейдегі жарыстар жас спортшылардың тәжірибесін арттырып, ел спортының дамуына серпін береді. Барша қатысушыға сәттілік, әділ бәсеке және жарқын жеңістер тілеймін», – деді басқарма басшысы.
Бірнеше күнге жоспарланған жарыс барысында жас спортшылар өз шеберліктерін көрсетіп, жүлделі орындар үшін бақ сынайды.
БҚО спорт басқармасы
