Орал қаласында алдағы сайлау науқанына дайындық жұмыстары жалғасуда. Аталған жұмыстың негізгі бағыттарының бірі – учаскелік сайлау комиссиялары мүшелерінің кәсіби даярлық деңгейін арттыру.
Орал қалалық аумақтық сайлау комиссиясының құрамына шаһар аумағындағы 136 учаскелік сайлау комиссиясы кіреді. Олардың қызметіне 1054 мүше қатысады, оның ішінде 52 адам комиссия құрамына алғаш рет енгізілді.
Түрлі себептермен комиссия құрамынан шыққан мүшелердің орнына тағайындалған жаңа мүшелер үшін оқыту семинарлары ұйымдастырылды. Оқыту семинарларын Орал қалалық аумақтық сайлау комиссиясының мүшелері өткізуде.
Семинарлар барысында қатысушылар учаскелік сайлау комиссиялары қызметінің құқықтық негіздерімен, олардың құрамын қалыптастыру тәртібімен және жұмысын ұйымдастыру мәселелерімен танысады. Есептен шығару куәліктерін беру тәртібіне, дауыс беруді ұйымдастыру мен өткізуге, сондай-ақ сайлау күні байқаушылармен өзара іс-қимыл жасау мәселелеріне ерекше назар аударылады.
Осындай оқыту іс-шараларын өткізу сайлау заңнамасының біркелкі қолданылуын қамтамасыз етуге және комиссия мүшелерінің сайлау науқаны кезеңіндегі жұмысқа даярлық деңгейін арттыруға мүмкіндік береді.
Орал қаласының аумақтық сайлау комиссиясы
