Орал қаласында жасанды интеллект технологияларына негізделген жаңа форматтағы цифрлық кеңсе ашылды. Заманауи орталық мемлекеттік қызметтердің қолжетімділігін арттыруға, тұрғындардың уақытын үнемдеуге және цифрлық мүмкіндіктерді кеңінен пайдалануға бағытталған. Салтанатты шараға облыс әкімі Нариман Төреғалиев, «Азаматтарға арналған үкімет» мемлекеттік корпорациясы» КЕАҚ Басқарма төрағасы Арман Кенжеғалиев қатысты.
Мемлекет басшысы Қасым-Жомарт Тоқаев «Жаңа тарихи кезеңдегі Қазақстанның өзекті міндеттері» атты Жолдауында цифрлық экономиканы қалыптастыру және озық технологияларды халық игілігіне пайдалану міндетін айқындады. Президент жариялаған Цифрландыру және жасанды интеллект жылы аясында өңірде бұл бағыттағы жұмыстар жүйелі жалғасуда.
Жыл басынан бері облыста 3 миллион 203 мыңға жуық мемлекеттік қызмет көрсетіліп, оның 98 пайызы электронды форматта жүзеге асырылды. Ал «Азаматтарға арналған үкімет» мемлекеттік корпорациясының облыстық филиалы ұсынған 629 мыңнан астам қызметтің 60 пайызға жуығы онлайн көрсетілді.
Жаңа кеңсе үш негізгі функционалдық аймақтан тұрады. Экспресс-аймақта тұрғындар анықтамалар мен қарапайым қызметтерді өз бетінше жедел ала алады. Цифрлық аймақта электрондық цифрлық қолтаңба рәсімдеу, туу, неке қию, тұрғылықты жері бойынша тіркелу және әлеуметтік төлемдерге қатысты қызметтер онлайн ұсынылады. Сараптамалық аймақта мамандар кәсіби көмек көрсетеді. Сондай-ақ азаматтардың цифрлық сауаттылығын арттыруға арналған арнайы оқу аймағы қарастырылған.
– Цифрландырудың басты өлшемі – технологияның күрделілігі емес, оның адам өміріне әкелетін нақты пайдасы. Жасанды интеллект жас ерекшелігіне, тұрғылықты жеріне немесе цифрлық дағдыларына қарамастан, әр азаматқа заманауи мемлекеттік қызметтерді еркін пайдалануға жол ашады, – деді Нариман Төреғалиев.
Өңірде цифрлық инфрақұрылымды жетілдіру және мемлекеттік басқаруға озық технологияларды енгізу жұмыстары жалғасады.
БҚО әкімінің баспасөз қызметі
