Өйткені күдік-күмәніміз расқа шығып, шаруа шешілмей, Орал қалалық әкімдігіне қарасты тұрғын үй-коммуналдық шаруашылығы, жолаушылар көлігі және автомобиль жолдары бөлімінің редакцияға жолдаған ресми жауабының соңы сиырқұйымшақтанып кетті. «Орал өңірі» газеті оқырмандарының, яғни ел-жұрттың орынды талап-тілегі әлі күнге дейін орындалмағандықтан, ақыры үшбу мәселеге үшінші рет оралуға мәжбүрміз.
Биылғы жылдың басында газетімізде жарияланған «Сиырқұйымшақтанып кетпесін!» («Оө», №5. 14. 01. 2022) атты мақаланы қайыра ұсынып отырмыз. Осы материалды оқыған кісі мәселенің мәнісін бірден түсінеді.
Ел Президенті Қасым-Жомарт Тоқаев «Еститін өкімет» қағидасын ұсынғанда халықтың мұң-мұқтажына билік өкілдерінің уақтылы құлақ асуын көздегені күмәнсіз. Бірақ біздің брондалған бюрократия оңайлықпен сыр берер емес. Қазақ арасында «Ер кезегі үшке дейін» деген ұғым-түсінік бар ғой, соған сайып «Орал өңірінің» осымен үшінші рет көтеріп отырған мәселесіне бәлкім, Орал қаласының басшылығы осы жолы сергектік танытар деген нәзік үмітіміз бар...
Редакция алқасы
