Ақжайық ауданы әкімі Қалияр Айтмұхамбетовтың төрағалығымен өткен жиында ақиық ақын Жұбан Молдағалиевтің 100 жылдығының дайындық барысы пысықталды.
Республикалық деңгейде аталып өтетін мерейлі дата аясында бекітілген іс-шара жоспарын талқылауға аудандық мекеме-бөлім басшылары, мәдениет, өнер, әдебиет саласының ардагерлері, Жұбан ақынның шығармашылығын насихаттаушылар жиналды. Аудан әкімі облыс орталығында бастау алатын мерейтойлық шаралар туралы айта келіп, аудан көлеміндегі атқарылар жұмыстардың легін баяндады.
«Ақынның тойы - ең алдымен, елдігімізге сын. Қазақтың біртуар ұлының ұлағатын, артына қалдырған мұрасын айшықтайтын шаралар жоғары деңгейде өтуі тиіс. Аудан орталығында бой көтеріп жатқан Жұбан орталығының ашылуын да осы күнге орайластырамыз. Торқалы тойға ақынның жары Софья апа, бала-келіндері, республикамыздың түкпір-түкпірінен қонақтар келеді деп күтілуде», - деді аудан басшысы. Ол 100 жылдыққа арналған шаралар барысында облыс орталығында ақын ескерткіші ашылып, мазмұнды қойылымның сахналатынын айтты. Ал ертеңгі күні елеулі шараға жиылған қауым аудан орталығында болып, Жұбан орталығының ашылуына қатысады. Осыдан соң мерейтой ақынның туған жері – Сайқұдықта жалғасып, осындағы кітапханада қайраткердің үш ерлігі сипатталатын панорамамен безендірілген «Жұбан бөлмесі» таныстырылады. Рухани орданың алдындағы аллеяда қасиетті топырақтан түлеген шамшырақтар – Сағынғали Сейітов, Бисен Жұмағалиев, Базарғали Қуатов, Жасталап Қуанғалиев, Шарифолла Саниев сынды жерлестеріміздің өмірбаяны жазылған тақтайша орналастырылады. Ал Қурайлысайда Ж.Молдағалиевтің 100 жылдығына арналған шараларды қорытындылайтын гала-концерт ұйымдастырылып, комьюнити орталықтың тұсауы кесіледі деп жоспарланды. Жұбан орталығының материалдық-техникалық базасын жабдықтау, кітапханалардың дайындығы жөнінде баяндаған аудандық орталықтандырылған кітапханалар жүйесінің басшысының міндетін атқарушы Елдос Бақманов осындай жоспарлармен бөлісті.
Аудандық мәдени-демалыс орталығының басшысы Ерлан Хабибуллин ақын мерейтойы аясында ауданда жергілікті, облыстық, республикалық деңгейде жоспарланған шаралар еліміздегі төтенше жағдайға байланысты онлайн режимде өткізілуде екенін баяндады. Айталық, әлеуметтік желілер арқылы Жұбан өлеңдерін оқу, әндерін насихаттау бағытында жұмыстар әлі жалғасуда. «Жұбанын әлдилейді Ақжайық» аймақтық республикалық ән байқауының ережелері көршілес облыстардың өнер ордаларына жолданды. «Жұбан жылы» деп жарияланған жылдың басты шарасында ҚР еңбегі сіңген әртістер Сәуле Таудаева, Қанатқали Қожақов, мәдениет қайраткерлері Марат Сарбөпеев, Жаңылсын Хасанова, Еркін Өтегенов, қазақ эстрадасының жұлдыздары Жұбаныш Жексенұлы, «Алаш» тобы, жерлесіміз Дәуренбек Мерғалиев өнер көрсетеді деп күтілуде. Сонымен қатар Е.Абайұлы Сайқұдық ауылдық кітапханасы, осындағы ақын рухына қойылған тәутұғыр, Қурайлысай ауылдық мәдениет үйін жөндеу жұмыстарына да тоқталды.
Ауданның тарихы, даңқты жерлестеріміз туралы белді басылымдардың редакторы, еңбек ардагері Бақтығали Қоспаев айтулы датаға орай баспаға дайындалып жатқан кітаптың мазмұндық құрылымы толықтай жасақталғанын баяндады. Бүгінде редакция алқасы материалдарды түзетіп, фотоматериалдарды іріктеуде. «Бұл жай анықтамалық қана емес, танымдық, тағлымдық, ғұмырдерек пен естеліктерге бай кітап болады. Оған әртүрлі басылымдардағы жарияланымдар, жыр-толғаулар, ақын өмірін сипаттайтын естелік суреттерден кіред. Қазақ әдебиетіндегі ақынның алар орны оның жерлестерінің, бірге жүрген жора-жолдастары және туыстары, ақын-жазушылардың ой-пікірлерімен толыға түсті», - деді Б.Дінішұлы.
Жиында Қурайлысай ауылдық округінің әкімі Орынбек Жапашев, аудандық мәдениет, тілдерді дамыту, дене шынықтыру және спорт бөлімінің басшысы Артур Ермуханов алдағы күндері атқарылар қам-қарекеттерді баяндап, ақын Сағынтай Бисенғалиев елдігімізді, ынтымақтастығымызды нығайту барысында жасалатын жұмыстардың тек мерекелік шаралармен толастамау қажеттігін, ертеңгі ұрпаққа ұлағат болар мазмұнға ие болуын, ел болып ұйыса түсіп, жақсылықтарды еселеуіміз керектігін тілге тиек етті.
Әлия Шарапиева,
Ақжайық ауданы
zhaikpress.kz
