Қазақтың бас ақыны Абай Құнанбаевтың 175 жылдығына орай елімізде көптеген іс-шаралар жүзеге асырылып келеді. Ұлы Абайға деген құрмет еш уақытта бәсеңдемек емес.
Күні кеше ғана Жұбан Молдағалиев атындағы Батыс Қазақстан облыстық ғылыми-әмбебап кітапханасы «Абай оқулары» облыстық онлайн байқауын ұйымдастырды.
Онлайн байқаудың І кезеңінде келіп түскен 50-ден астам өтініштер, эсселер мен бейнежазбалар қаралып, қазылар алқасының шешімімен 10 қатысушы ІІ кезеңге өткізілді.
Байқаудың ІІ кезеңге 4 тамыз күні «Абай әлемі» интеллектуалды әдеби телеbattle түрінде өткізіліп, жүлдегерлер анықталды.
Байқау қорытындысы бойынша бас жүлдені Шыңғырлау аудандық орталықтандырылған кітапхана жүйесінің оқырманы Айдос Исекенов жеңіп алды.
І орынды Жанақала ауданы, Бірлік ауылдық кітапханасының оқырманы Гүлбақыт Дүйсен, ІІ орынды Ақжайық ауданы, Алмалы ауылдық кітапханасының оқырманы Әйгерім Насибуллина, ІІІ орынды Бөрлі ауданы, Ақсай қаласының оқырманы Оксана Барасова иеленді.
Ұйымдастырушы тараптан жеңімпаз-жүлдегерлерге дипломдар мен сыйлықтар табыс етілді.
Айта кету керек, байқауға қатысушылардың өнерлерін өңірге танымал ақын, жұбантанушы ұстаз Үзілдік Елеубаева бастаған қазылар алқасы бағалады.
Ертай Бимұханов,
zhaikpress.kz
