Бәйтерек ауданы Зеленый ауылының тұрғындары жаз болса, үйлеріне кіріп тұрған ауыз су күші азайып, кей көшелерде мүлдем су болмай қалатынын айтқан болатын. Жұмыс сапарымен Бәйтеректе болған Ғали Нәжімеденұлы осы мәселенің не себепті туындап отырғанын білмек боп, ауылға су беруге жауапты мекеме «ҚазсуШар» АҚ өкілдерімен тілдесті.
Кездесуге келген Каменский су өндірістік учаскесінің басшысы Сергей Сементевтің айтуынша, ауылға ауыз су жүргізу кезінде кей жерлерде қателіктер кеткен. Сол себепті су қысымы азайып, биіктікте орналасқан көшелерге су жетпей қалады екен. Сондай-ақ жаздыкүні ауыз су тұтынуының бірнеше есе артуына байланысты резервуарларға су толып үлгермейтін көрінеді.
– Қысты күні зеленыйлық ағайын 80 текше метр су пайдаланса, жазда оның мөлшері 360 текше метрге дейін жетеді. Бұл да су тапшылығына алып келіп отыр, – дейді С.Сементев.
Деркөл өзенін жағалай қонған Зеленыйда техникалық су жеткізу жағынан ешқандай мәселелер жоқ. Ауыл ішіне арықтар мен арнайы құбырлар да тартылған. Бірақ тұрғындар су бағасының арзан болу себебінен малын да, бақшасын да үйге келіп тұрған ауыз сумен суаруда.
– Ауылға техникалық су кіргізу мүмкіндігі болса, оны пайдалануымыз керек. Ауыл маңынан аққан өзен суын ел игілі үшін жұмсаған жөн. Су тапшылығы облыс орталығында да сезіледі. Оны барлығымыз көріп, біліп жүрміз. Болашақта дифференцияланған төлемге көшетін болсақ, тұрғындар қиналып қалмауы керек, – деді Ғали Есқалиев.
Бұдан бөлек облыс басшысы күрделі жөндеу жүріп жатқан ауыл мектебіне барған Ғали Нәжімеденұлы құрылысшылармен сөйлесіп, мектеп ішін аралап шықты.
Мердігер Сәбит Бекқалиев оқу жылы басталғанша барлық жұмыстардың аяқталатынын жеткізді.
– Мектепті жөндеу жұмыстары 25 тамызға дейін аяқталады деп күтілуде. Жөндеу жұмыстары басталған күннен бері құрылыс басында жүрміз. Жасалған жұмыстар көңілімізден шықты. Биыл орын алған жағдайға байланысты сабақтар онлайн режимінде өтетін болады. Тек бір және төртінші сынып оқушылары дәстүрлі түрде білім алады, – деді мектеп директоры Мерхат Есенғалиев.
Түгелбай БИСЕН,
Зеленый ауылы
zhaikpress.kz
