«Жаңғыру жолы» жастар қозғалысының бастауымен, «Біргеміз, таза әлем» акциясы аясында Пятимар тоғайына тазалық жұмыстары жүргізілді.
Қоршаған ортаны тазалап қана қоймай, сол іспен табыс табуға болатынын халыққа жеткізуді мақсат тұтқан сенбілікте жиналған қоқыс пластик, әйнек, алюминий болып сұрыпталып, жүк көлігіне тиелді. Қоғамдық бақылау мүшесі Дулат Мақатовтың айтуынша, іріктелген қоқыс қабылдау орындарына тапсырылады. Ал түскен қаражат қайырымдылық қорының шотына аударылады. Осындай игі бастамаға аудандық мәдениет, тілдерді дамыту, дене шынықтыру және спорт бөлімінің басшысы Талғат Бексариев, Пятимар ауылдық округінің әкімі Жақсылық Хайрелов, аудандық жастармен жұмыс жөніндегі ресурстық орталық басшысы Мәрлен Ғилымхан қолдау білдірді.
Сондай-ақ өз өлкесінің тазалығына мән беріп, жанашырлық танытқан отызға жуық ерікті жас тазалық жұмыстарының сапалы әрі тез жүргізілуіне атсалысты. Шашылған қағаздар мен босаған бөтелкелер сәнін бұзған бұл тоғай әп сәтте ажарланып сала берді. Кеудемізде: «Шіркін, бұнда келген әрбір адам тазалыққа мән беріп, өзіне эстетикалық ләззат сыйлайтын орынға құрметпен қараса ғой» деген ой қылаң берді.
Ә.Ерсінқызы,
Жаңақала ауданы
zhaikpress.kz
