Жуырда Тасқала ауданы әкімдігінің үлкен залында Қазақстанның орталықтандырылған бірыңғай статистика органының құрылғанына 100 жыл толуына орай салтанатты жиын өтті. Шараға мемлекеттік статистика саласының қызметкерлері мен елге еңбегі сіңіп, абыройға бөленген сала ардагерлері қатысты.
Аудан әкімі Алдияр Халелов кездесуді аша келе, жиынға қатысушыларды осы атаулы күнмен құттықтады.
– Бір ғасыр уақыт ішінде қалыптасу мен дамудың өткелдерінен өтіп, алға қойылған міндеттерді абыроймен орындап келесіздер. Сіздердің қызметіңіз ұлттық экономиканың қарқынын және тұрғындардың тұрмыс деңгейін сараптап, алдағы ауқымды істерді жоспарлауға ықпал етеді. Әр күнгі тынымсыз істеріңіз еліміздің гүлденуі мен дамуына сүбелі үлесін қосып келеді. Сіздерді кәсіби мерекелеріңізбен және статистиканың 100 жылдық мерейтойымен шын жүректен құттықтаймын. Дендеріңізге саулық, отбасыларыңызға бақ пен береке, кәсіби салаңызда зор табысқа жетуіңізді тілеймін, – деді аудан басшысы өз сөзінде.
Жиын барысында қатысушыларға аудан әкімі Алдияр Халеловтың атынан алғысхаттар табысталды.
Нағима Дүйсекешова: – Осы салада өзім он бес жыл жұмыс істедім. Өте қызықты сала. Бүгінгі мерекемізді ескеріп аудан әкімдігінің құттықтап жатқандарына рахметімізді айтамыз. Сала қызметкерлерін, яғни барша әріптестерімді де шын жүректен құттықтаймын.
Болат Бек
Тасқала ауданы
zhaikpress.kz
