Біздің өңірдің негізгі су көзі – Жайық өзені. Ол облыс аумағының солтүстік-шығысынан оңтүстікке қарай ағып өтеді. Жайықтың облыс аумағындағы салалары – Елек, Шыңғырлау, Шаған, Барбастау, Емболат, Быковка, Рубежка өзендері. Барбастау өзенінен төменірек Жайықтан Көшім өзені бөлініп шығады. Жалпы, облыста үлкенді-кішілі 200-ден астам өзен бар, олардың жартысына жуығы жазда кеуіп, құрғақ арналарға айналады.
Батыс Қазақстан облысы бойынша экология департаментінің зертханалық-талдамалы бөлімінің басшысы Нұрлы Исмаилова облыстық «Орал өңірі» газетінің №90 санында шыққан «Өзен-көлдеріміз ластанбасын десек...» мақаласында облыс тұрғындарын айналамызды таза ұстап, су қорларын үнемдеп жұмсауға шақырады.
