Таяуда Теректі аудандық балалар шығармашылығы үйінің «Теректідегі тебіреніс» жобасында жерлесіміз, әскери самбодан әлем чемпионы Темірлан Ихсанғалиев қонақ болып, көрермендермен тікелей эфир арқылы жүздесті.
Аңқаты ауылында дүниеге келген Темірлан Мерданұлы – үйдің кенжесі. Әкесі Мердан дене шынықтыру пәнінің мұғалімі болған соң, балаларын спортқа баулыған. Кенжесінің табандылығын, айтқанынан қайтпайтын қайсар мінезін байқап, 8-сыныптан бастап Қарағанды қаласындағы дарынды балаларға арналған спорт мектеп-интернатында оқытқан.
Спорт десе, ішкен асын жерге қоятын жанұяда өнеге алған Темірлан 10 жасында алғаш рет Шалқар жағасында еркін күрестен өткен сайысқа қатысқан. Сол уақыттан бері жеңістің дәмін татқан бала Темірлан мақсатын айқындап, өмірдегі бағытын бағдарлай білген. Баласының ойын әкесі де құптап, жаттықтыруды қолға алады.
Бүгінде әлемдік деңгейдегі олимпиадаларға қатысып, еліміздің намысын қорғап, көк туымызды желбіретуді армандаған Темірлан дегеніне жетті. 2018 жылы бағы мен бабы келісіп, Румынияда өткен әлем чемпионатында алтыннан алқа тақты.
Сұқбат барысында әскери самбо шебері әкесіне, Амангелді Мұсабеков, Бақытжан Ибраев сынды бапкерлеріне алғыс айтуды да ұмытпады. Діттеген мұратыңа қол жеткізу үшін жеңген кезде даңдайсып, кеуде кермеу керегін, жеңілгенде жасымай, алға ұмтылып, жаттығу қажеттігін айтып өтті.
Болашақта жаттықтырушы болып, туған жері мен облыс орталығы Орал қаласында спорт клубын ашуды жоспарлап жүрген Темірлан Мерданұлы жобаның екінші бөлімінде балалар шығармашылығы үйінің «Жас тілші» үйірмесінің тілшілерінің, «Бетпе-бет» кезеңінде жүргізуші сұрақтарына қысқа да нұсқа жауап берді.
Тікелей эфирде көрермендер тарапынан қойылған барлық сұраққа толық жауап қайырған спортшы өз еліне ешқандай жердің тең келмейтінін ерекше толқумен айтты.
Жоба соңында жүргізуші Үміткер Орынғалиев жоба қонағына Теректі аудандық білім беру бөлімі басшысы Жанаргүл Хусаинованың атынан алғыс хат ұсынып, сәттілік тіледі.
Аягөз Айтқалиева,
Теректі ауданы
zhaikpress.kz
