Бөкей ордасы ауданының Хан ордасы, Сайқын, Бисен ауылдарында "Nur Otan" партиясының үміткерлері ретінде тіркелген облыстық мәслихат хатшысы Мәлік Құлшар, М.Өтемісов атындағы БҚМУ-дың доценті Жаңабек Жақсығалиев, Ақжайық ауданы Тайпақ ауылдық аурухана меңгерушісі Сəбира Сүндетовалар келіп, аудан тұрғындарымен кездесті.
Естеріңізге сала кетсек, ауданымызға арнайы келген бұл азаматтар облыстық конференция депутаттарының ең көп дауысын иеленіп, алғашқы үштікке енген еді.
ҚР Мәжіліс депутаттығына үміткерлер аудан жұртшылығымен кездесу барысында үміткерлер сайлауалды бағдарламаларымен таныстырып, "Nur Otan" партиясының осы жолы әр аймаққа өзіндік нақты бағдарлама құрылғанын баса айтты.
Туған жердің дамуына тамшыдай үлес қоссам деп саяси аламанға атын қосқан белгілі ұстаз, мықты тарихшы Жаңабек Жақсығалиев ұлттық құндылықтар мен руханиятқа қатысты ойларын ортаға салды.
Мәлік Құлшар елде атқарылып жатқан игі істер мен өңірімізде іске асқан ілкімді істердің "Nur Otan" партиясының бағдарламасы аясында жүзеге асып жатқанын айтты.
Өз мамандығына сәйкес Сәбира Сүндетова сайлауалды бағдарламасында медициналық қызмет сапасын арттыру мәселесіне тоқталды. Сәбира Өмірғалиқызы аудан аумағында фельдшерлік амбулаториялық пункттердің күрделі жөндеуден өткізу жоспарланғанын айтып, бір қуантты.
Аудандық мәслихатқа үміткер Лариса Қайырғалиева "Nur Otan" партиясы қолға алып жатқан әр ісі халықтың әл-ауқатын көтеру үшін жасалып жатқанын айтты.
Кездесуді жүргізген "Nur Otan" партиясы аудандық филиалы төрағасының бірінші орынбасары Мейрамбек Аққалиев шараға қатысушыларды 2021 жылдың 10 қаңтарында өтетін сайлауда игі бастаманың басында жүретін "Nur Otan" партиясына дауыс беруге шақырды.
zhaikpress.kz
