16 наурыз күні М.Мералиев атындағы тарихи-өлкетану музейінде аудан айнасы «Қаратөбе өңірі» газетінің жарық көре бастағанына 85 жыл толуына орай «Мылтықсыз майдан майталмандары» атты журналистермен кездесу кеші өтті.
«Қаратөбе өңірі» газетінің ең алғашқы саны 1936 жылы 16 наурызда «Колхозшылар үні» атауымен қалың оқырманға жол тартқан. Газеттің тұңғыш редакторы – Жұма Бақтияров. Ал 1957 жылы ұжымшарлар таратылып, кеңшарлар құрылғанда аудандық партия комитетінің №9 бюро шешімімен газеттің атауы «Еңбек туы» болып өзгертілді. 2006 жылдан бастап «Қаратөбе өңірі» атауымен шығып, содан бері танымдық, жаңашылдық мақалаларымен халық көңілінен шығып келеді.
Ауданның маңдайына біткен айтулы тұлғалардың қолтаңбасы қалған төл газетттің мерейтойына арналған мерекелік шарада сөз сөйлеген аудан әкімінің орынбасары Жасұлан Сұлтан ауданның қалыптасу кезеңдерінде халық қамын күйттеген, тәу етер тәуелсіздігіміздің жетістіктерін дүйім жұртқа жариялап келе жатқан газет ұжымын мерейлі мерекелерімен құттықтап, аудан әкімі Жанат Асантаевтың құттықтау хаты мен естелік сыйлығын табыстады.
Шарада құттықтау сөз алған аудандық мәслихат хатшысы Қадыржан Сүйеуғалиев пен аудандық ішкі саясат бөлімінің басшысы Нұртас Сафуллин аудан баспасөзінің билік пен халық арасындағы алтын көпір екендігіне, бүгінгі жазылған жаңалық газет беттері арқылы тарихқа айналатындығын жеткізіп, редакция ұжымына шығармашылық ізденіс пен табыс тіледі.
Әр жылдарда төл газеттің ауыр жүгін арқалаған майталман журналистер қанатты қолтаңбалаларын қалдырды.
Мерекелік кеште қарымды қаламгер, өлкетанушы, журналист Қайыржан Хасановтың зайыбы Рысты Бижанова мен «Еңбек туы» газетін ұзақ жылдар басқарған Ғаббас Жәнібековтың ұлы Еркінбек Жәнібеков, «Қаратөбе өңірі» газетінде 20 жыл қызмет жасап келе жатқан журналист Ерболат Райсов аға буын қызметкерлердің елеулі еңбектеріне тоқталып, редакция жұмысындағы естеліктермен бөлісті.
Кешті қорытындылаған «Қаратөбе өңірі» газетінің директор-редакторы Маралбек Амантаев шараға қатысқан барша қонақтарға алғысын білдірді. Мерекелік шарада аудандық мәдени-демалыс орталығының әншілері сазды сәлемдерін жолдады.
Серікбай Хасанов,
Қаратөбе ауданы
zhaikpress.kz
