Мерекелердің төресі және көнесі – Ұлыстың ұлы күні қарсаңында «Орал өңірі» газетінің редакция ұжымы былтырғы жылы бастау алған іс-шараны дәстүрге айналдырып, бар тіршіліктің жанданатын шағы көктемнің белгісі ретінде өзара гүл сыйласты. Аталмыш шара былтыр өзара ынтымақтастық пен бірлікті, кішіпейілділік пен сыйластықты арттыру мақсатында телеарнадан көрсетіліп, халыққа насихатталған еді.
– Наурыз – Жер-ананың тамырына қан жүгіртіп, тіршілік атаулыны қайта оятып, жаңартатын кез. Табиғат жан-дүниесімен жадырап, өзегінен қауашақ жарып, көкөрім өмірдің нәрін көктететін, тіршілік біткеннің тулай аққан қанын жаңаша жасартатын шақта адамның адамға гүл сыйлауы – жанды жадыратып, көңілге қуаныш ұялатар іс. Ендеше, осынау қуанышты мерекеде құшақтарыңыз гүлге толып, шаңырақтарыңыздан ырыс, құт-береке, молшылық кетпесін! – деді ұжымды Жаңа жылмен құттықтаған «Орал өңірі» газетінің бас редакторы Бауыржан Ғұбайдуллин.
Өз қолдарымен отырғызған қалыңқой (каланхоэ), әйел бақыты, доллар, наурызшешек (примула) секілді гүлдерді бір-біріне шынайы пейілмен сыйлаған әріптестер мерекелік шат-шадыман көңіл күйде ризашылықтарын білдіріп жатты.
Біздің ендігі тілек осы ізгі іс өз жалғасын тауып, өзге мекеме-ұйымдарға да жұғысты болса дейміз.
Мәрзия Исайқызы,
zhaikpress.kz
