Отбасы – қай заманда болсын мықты мемлекеттің негізі болып есептеледі. Елімізде үлгілі отбасыларды анықтау мақсатында дәстүрлі түрде «Мерейлі отбасы» ұлттық байқауы ұйымдастырылып келеді. Бүгін Ақ Жайық өңірінде аталмыш байқаудың облыстық кезеңі аяқталып, өнегелі отбасылар анықталды. ҚР Тәуелсіздігінің 30 жылдығы қарсаңында жетінші мәрте ұйымдастырылған байқауға қатысу үшін 137 батысқазақстандық отбасы өтінім берген.
- Қадірлі Ақ Жайық өңірінің тұрғындары! Баршаңызды «Мерейлі отбасы» ұлттық конкурсының өз мәресіне жетуімен шын жүректен құттықтаймын! Өздеріңізге мәлім, Елбасы Нұрсұлтан Әбішұлының бастамасымен 2013 жылдан бері отбасы құндылығын насихаттау, салт-дәстүрлерді жаңғырту мақсатында «Мерейлі отбасы» байқауы өткізіліп келеді. Бүгін міне облысымызда жетінші мәрте ұйымдастырылып, қорытындылануда. Өңірімізде «Мерейлі отбасы" байқауына қатысу үшін 137 отбасы өтінім берген. Бұл соңғы жылдардағы өтінім берген отбасылармен салыстырсақ, үлкен көрсеткіш. Ақ Жайықтық отбасылар бұл байқауға бейжай қарамай, бақтарын сынауда. Байқаудың екінші кезеңіне 26 отбасы жолдама алған. Ал бүгін солардың ішінен үздіктері анықталды. Еліміз соңғы екі жылда пандемиямен күресіп келеді. Пандемия бізге отбасы құндылығы мен жақынымызға жанашыр болуды ұқтырды. Тәуелсіздік мерекесі қарсаңында байқауға қатысқандарыңыз үшін алғыс айтамыз. Індетті төрт көзіміз түгел болып еңсерейік. Баршаңызға зор денсаулық, бейбітшілік пен өсіп-өркендеу тілеймін! Шаңырақтарыңызға шаттық, жайлылық пен молшылық салтанат құрсын, -деді облыс әкімінің орынбасары Бақытжан Нарымбетов.
«Мерейлі отбасы» байқауының жеңімпазы деп бөкейордалық Тәжімұратовтар отбасы танылды. Ал екінші орын казталовтық Өтеғұловтарға, үшінші орын тасқалалық Нагиевтер жанұясына бұйырды.
Гүлсезім Бияшева,
zhaikpress.kz
