Ел Тәуелсіздігінің 30 жылдық мерейтойы мен Жамбыл Жабаевтың 175 жылдығына орай ұйымдастырылған ІІ Республикалық «Көне Тараз күмбірі» атты республикалық фольклорлық ансамблдер конкурсында Бәйтерек ауданының өнерпаздары да бақ сынады.
«Рухани жаңғыру» бағдарламасын ілгерілету, егемендік мерекесі мен жыр алыбы Жамбылдың шығармашылығына деген қызығушылықты арттыру және қазақстандық композиторлардың туындыларын жаңғырту әрі фольклорлық ұжымдармен тәжірбие алмасу, жас шығармашылық топтар мен әнші-термешілерді таныту, шеберліктерін шыңдау мақсатында өткізілген байқауға аудандық балалар саз мектебі жанынан құрылған «Бәйтерек сазы» фольклорлық ансамблі қатысты.
Аудандық саз мектебінің директоры Ляззат Қажығалиеваның айтуынша, Жамбыл облысы әкімдігі, мәдениет, архивтер және құжаттама басқармасына қарасты Кенен Әзірбаев атындағы облыстық филармонияның ұйытқы болуымен өткен байқауда еліміздің әр түкпірінен келген он сегіз ансамбль өнер көрсетіпті.
Байқау ережесі бойынша қатысушылар, «Көне Тараз күмбірі» I Республикалық конкурстағы партитуралар жинағына енген бір күйді, Жамбыл өңіріне арналған жаңа бір әнді, Ж.Жабаевтың шығармашылығынан бір нөмір және өз өңірінің бір күйін орындау қажет болған.
Алуа Төресаева жетекшілік ететін «Бәйтерек сазы» фольклорлық ансамблі Тараздағы ағайынға Марат Бердіғұловтың «Шахристаны» мен Кенен Әзербаев «Құлақ» күйін, Ләззат Қажығалиеваның «Жұлдызым Жібек жолы бойындағы» туындысы мен Артур Сисеновтің орындауындағы «Ақжайық» әндерін паш еткен.
Әр өңірдің үздік ансамблдері бақ сынаған конкурс қорытындысында аудан өнерпаздарын бастап барған ансамбль жетекшісі Алуа Төресаева мен саз мектебінің директоры Ләззат Қажығалиеваға арнайы алғыс хат және көне Тараз бен Жамбыл өңірін суреттейтін жаңа әндер жинақталған «Жамбылым – ән бесігім» атты партитуралар жинағы табысталған.
-Конкурс жоғары деңгейде өтті. Филармония жанынан құрылған ансамбльдермен тереземіз тең өнер көрсету біз үшін үлкен жетістік. Аз уақыт ішінде бұндай жеңіске жету көңілімізді қуантып отыр. Алдағы болатын конкурстарға дайындығымызды бүгіннен бастап кеттік, бұйырса жақсы жаңалықтарымызбен қуантамыз -дейді аудандық саз мектебінің директоры Ләззат Қажығалиева.
Назерке Сыйлыбаева,
Бәйтерек ауданы
zhaikpress.kz
