Ел халқын отандық азық-түлікпен қамтуға барлық мүмкіндік бар. Бұл туралы Сенат отырысында ҚР Ауыл шаруашылығы министрі Ербол Қарашөкеев айтты.
«Ауыл шаруашылығы министрлігінің алдына қойылған міндеттің бірі – халықты Қазақстанда өндірілген азық-түлік тауарларымен, ең алдымен құс еті, балық, шұжық, сүзбе мен ірімшік, алма және қантпен қамту. Ол үшін таяуда қабылданған Ұлттық жобалар аясында 930-дан астам инвестициялық жобаны 2025 жылдың соңына дейін жүзеге асыру көзделген. Онда 150-ден астам тауарлық сүт фермасын пайдалануға беру қарастырылған. 19 үлкен құс фабрикасы салынады. Оның ішінде 9 ет өңдейтін зауыт болады. 6,6 мың гектар қарқынды бақты пайдалануға беру де жоспарланған» - деді министр Сенат депутаттарының сауалына орай.
Оның атап өтуінше, аталған жобаларды жүзеге асыруға 4,5 трлн теңге қаражат тартылады. «Ал қарастырылып отырған 2022-2024 жылдарға арналған 3 жылдық бюджетте 235 млрд. теңге көзделген. Бұл қаражат инвестициялық субсидия мен несие және лизинг төлемақысын төмендететін субсидия үшін қарастырылып отыр. Жалпы Қазақстанда өндірілетін азық-түлік тауарларын ел халқына қолжетімді жасауға барлық мүмкіншілік бар деп санаймыз», - деді Ербол Қарашөкеев.
