Бәйтерек ауданы Мичурин ауылында ел Тәуелсіздігінің 30 жылдығына арналған «Мен тәуелсіздік құрдасымын» жобасы қорытындыланды. 91-дің түлектеріне құрмет көрсетіп, ел мен қоғамға пайдасы тиген егемендік құрдастарының ісін көпке үлгі ету мақсатында оздырылған жобаның берері мол.
Шара басында қонақтар ауыл клубы жанынан жұмыстанатын «Ақжүніс» қыз-келіншектер клубының көрмесімен танысып, «Асыл әжелер» ансамблінің дастарханынан дәм татты. Одан әрі «Әсем гүлдер» би ансамблінің өнерін тамашалады.
Орда бұзар жасқа келген азаматтар мен азаматшаларды көрмекке арнайы келген Бәйтерек ауданы әкімінің орынбасары Ерікқали Бисақаев тәуелсіздік құрдастарының жаз бойы жалғасқан жобасының маңыздылығын атап өтіп, ел құндылықтарына тоқталды.
Жоба аясында мәдениет, білім, спорт, ауыл шаруашылық, волонтерлық саласында белсенді жұмыстанып, тәуелсіздік мерекесіне арналған шараларға ерекше белсенділікпен атсалысқан жастарға алғысхат ұсынып, табысты еңбек тіледі.
Арал Болпышұлы,
Бәйтерек ауданы,
zhaikpress.kz
