Таяуда Бөкей ордасы аудандық дене шынықтыру-сауықтыру кешенінде ҚР Құрметті спорт қайраткері, ҚР еңбек сіңірген жаттықтырушысы, КСРО спорт шебері, Бөкей ордасы ауданының «Құрметті азаматы» Жұбанышқали Садырұлы Жардемовты еске алуға арналған қазақ күресінен жасөспірімдер арасында облыстық ашық турнир өтті.
Жарыстың салтанатты ашылуында Бөкей ордасы ауданының әкімі және Жұбанышқали Садырұлының баласы барша қонақтарға, спортшыларға сәттілік тілеп келген командаларға алғыстарын айтты. Бұл жарыста 10 командадан 150-дей палуан бақ сынады. Осы облыстық жарысқа Жаңақала ауданының жас палуандары да қатысып, жеңістің биік тұғырынан көрініп жеңімпаз жүлдегер атанды. Атап айтар болсақ, 38 келі салмақта белдескен Ералы Ишан қарсыластарының барлығын таза жеңіп жеңімпаз атанса, 42 келі салмақта белдескен Ділмұрат Меңдібекұлы есімді жас палуанымыз да І орынға ие болды. 42 келі салмақта белдескен тағы бір палуанымыз Нұржігіт Талап финалдық жолдама үшін кездесуде қарсыласына есе жіберіп, қола жүлде үшін белдесуде жеңіске жетіп, қола жүлдеге қол жеткізді. 50 келі салмақта белдескен Әлихан Амангелді қарсыластарының барлығынан басым түсіп, жеңістің ең биік тұғырынан көрінді. +55 келі салмақта бақ сынаған жас түйе палуанымыз Тамерлан Серікұлы жартылай финалда ұпай санымен қарсыласына есе жіберіп, қола жүлде үшін белдесуде үмітті ақтады.
Жалпыкомандалық есеп бойынша ауданымыз ІІ орынға жайғасты. Осы жарыста жеңімпаз және жүлдегер атанған спортшыларымызды және осы жарысқа команда жасақтап апарған жаттықтырушылар Замир Серікұлы мен Дәурен Ерланұлының жетер жетістіктері әлі алда екендігіне шүбәсіз сенеміз.
Ж.Жұмағұлов,
Жаңақала ауданы
zhaikpress.kz
