Қазақстанның әлемдегі бәсекеге қабілетті мемлекеттер қатарына енуіне ғылыми, мәдени таным беретін, жылдан жылға кең қанат жайып, көркейіп келе жатқан кітапхана қызметінің қосар үлесі зор. Бүгінгі кітапхананың мақсаты – ауыл жұртшылығының сұранысын қамтамасыз ету үшін өзінің ақпараттық әлеуетін нығайту, оқырман қауымның ақпараттарды білуге деген талап-тілегіне қолдау көрсету, электронды ресурстарды тиімді қолдануға үйрету. Сондықтан аталмы мекеменің жұмысын жаңа бағытта жаңғыртуды қолға алудың маңызы зор.
Жуырда Елбасы Нұрсұлтан Әбішұлы Назарбаевтың «Болашаққа бағдар: рухани жаңғыру» бағдарламалық мақаласының «Жаһандағы заманауи қазақстандық мәдениет» арнайы жобасы аясында ел Тәуелсіздігінің 30 жылдық мерейтойына орай Алғабас елдімекенінде Алғабас ауылдық кітапханасындағы комьюнити орталығы ашылды. Рухани орда бүгінде 1200-ден астам оқырманға қызмет көрсетуде.
Комьюнити орталықтың тұсауын Ақжайық ауданы әкімінің орынбасары Ердос Үмітов пен ауылдық ардагерлер кеңесінің төрағасы Сәлімгерей Құбашев кесіп, Жұбан ауылдық кітапханасының кітапханашысы, айтыскер ақын Мейірман Шакенов арнау жолдады.
Орталықта дәстүрлі және электронды кітаптарды оқуға арналған «Руханият» алаңы, тұрғындардың Egov-электронды порталына және балалардың қауіпсіз сайттарға қолжетімділігін қамтамасыз ету үшін «Қауіпсіз интернет» алаңы, кез келген адамға өзінің сүйікті ісімен айналысуына, жастардың шығармашылық, интеллектуалдық әлеуетін арттыруға арналған Relax алаңы, балаларға арналған KIDS алаңы жасақталды. Аталмыш орталық заманауи жабдықтармен қамтылған.
Шара барысында кітапханашылар орталықтағы алаңдарды және ауданымыздың спорт шеберлері туралы аудандық кітапхана сайтында ашылған «Спорт саңлақтары» айдарын таныстырды. Сонымен қатар күні кеше ғана тұсауы кесілген «Тәуелсіздік шежіресі: Ақжайық ауданы 2011-2021» басылымдарын шара қонақтарына тарту етілді. Ауыл ақсақалдары игі бастамаға ризашылықтарын жеткізді.
Әлия Шарапиева,
Ақжайық ауданы
zhaikpress.kz
