Жыл сайын Жаңа жыл қарсаңында әрбір бала ғажайыпты күтеді. Өңірде жылдан-жылға балаларға жақсылық жасайтын жандар саны арта түсуде. Ағымдағы жылдың 29 желтоқсанында Орал қаласында өткен «Жомарт жүрек – 2021» меценаттар форумында «Тілектер шыршасы» деп аталатын шыршада ойыншықтардың орнына 100 баланың жеке тілектері жазылған қағаздар ілінген болатын. Форумға қатысушы кәсіпкерлер бір-бірлеп шыршаға барып, ілінген қағаздарды оқып, кішкентай балаларымыздың арман-тілектерін орындауға уәде берген еді.
Жарқын мереке қарсаңында жомарт жүректі жандар бүлдіршіндерді арнайы құттықтап барып, армандаған сыйлықтарын табыс етуде.
Мәселен "СВС Батыс" ЖШС басшысы Замир Сарсенбаев Казталов мектеп-лицейінің 4-сынып оқушысы Байзақ Жансезімге, ал "Топан" ЖШС директоры Ғайса Жұмалиев Жаңақала ауданының №3 ЖОББМ 3-сынып оқушысы Меңдібай Исмаилға өздері армандаған ұялы телефондарын сыйлады.
Бұл балақайлар өз хаттарында "Менің арманым өзімнің жеке ұялы телефоным болса екен деймін. Барлық балалар секілді өзімнің телефоным болғанын қалаймын" деп жазған екен.
Сондай-ақ Сырым ауданы, Қособа ауылының мектеп оқушысы Юнус Мәртебенің армандаған смарт сағатын "KCG" ЖШС директоры Мұқамбедиев Мұратбек алып берді. Меценат әперген сыйлықты бүлдіршінге ауыл әкімі Бейімбет Жайманов табыстады.
Тілектер шыршасына жазған хатында бүлдіршін "Арманым әнші болу, алайда өскен сайын тілектерімнің саны арта бастады, қазіргі уақытта басты арманым мұғалім болу. Мектепті жақсы бітіріп, универге түсу және жер бетіндегі адамдардың мейірімді болуы. Ең бастысы қолға тағатын смарт сағат болса қуанар едім" деп жазыпты.
Ал Ержан Хасанов есімді кісіпкер Орал қаласы №10 ЖОББМ 2-сынып оқушысына қысқы шана, ал Бәйтерек ауданының Қ.Аманжолов ат. ЖОББМ 1-сынып оқушысына домбыра сыйлады. Сонымен қатар "Фасад Оптима" ЖШС директоры Арман Шындаров Бәйтерек ауданының Қасым Ахмиров атындағы "мектеп-бөбекжай-балабақша" кешенінің 4 сынып оқушысы Солодовникова Ульянаға ұялы телефон сыйға тартты.
Ал "Казхол" ЖШС Орал қаласы, №17 ЖОББМ, 2-сынып оқушысы Салиева Мунираға қуыршақ, тәттілер, шана, сурет салуға арналған құралдар сыйласа, "Батыс Су Арнасы" ЖШС Орал қаласы, № 30 ЖОББМ, 1-сынып оқушысы Азамат Амирге боксқа арналған груша, сыңары Аминаға қысқы шана сыйға тартты.
zhaikpress.kz
