Сырым аудандық мәдениет үйінің фойесінде ұлттық өнердің хас шебері Нұрболат Қабиевтің қолөнер бұйымдарын, ауылдық округ әкімдері ауыл-елді мекендердің даму жағдайы туралы, аудандық жұмыспен қамту орталығының басшысы Саламат Хамидуллин аудан кәсіпкерлерінің сатып алған құрылғыларымен, саттыққа шығаратын өнімдерімен таныстырды.
Ғали Есқалиев аудандық мәдениет үйінде өткен «Ауылдық елді мекендердің тұрақты дамуының жолдары» атты семинар-кеңеске қатысып, төрағалық етті. Агроөнеркәсіптік кешенді дамытуды, тәжірибе алмасуды мақсат еткен семинар-кеңеске Сырым, Қаратөбе, Шыңғырлау аудандарының әкімдері, орынбасарлары, ауылдық округ әкімдері қатысты. Өңір басшысы Ғали Есқалиевтің кіріспе сөзінен кейін облыс әкімінің бірінші орынбасары Арман Өтеғұлов баяндама жасады.
Мемлекет басшысы Қасым-Жомарт Тоқаевтың әлеуметтік маңызы бар азық-түлік тауарларын толық алмастыруға қол жеткізу туралы тапсырмасына сай ішкі отандық нарықтық өнімдерді толықтыру жөніндегі кешенді жоспарлар жасақталды. Өңір халқын Батыс Қазақстанда өндірілген өніммен қамту бойынша жоспар жүзеге асырылады. Азық-түліктің 10 түрімен облыс өзін-өзі қамтып отыр. 5 азық-түлікпен 60 пайыз және одан жоғары қамтылып отыр. Тоғыз азық-түлік бойынша ішінара және толық тәуелділігіміз бар. Күріш және қант өнімдері біздің облыста өндірілмейді. Облыста жасыл және сүтті белдеуді жандандырып отырмыз. Жасыл белдеу – жеміс-жидекпен қамтамасыз ету Ақжайық, Бөрлі, Бәйтерек, Тасқала аудандары мен Орал қаласы аумағында жүзеге асырылады,-деген Арман Кәрімұлы сүт өнімдерімен өңірді қамтамасыз ететін үш ауданның бірі Сырым ауданы екенін атап өтті. Облыстың дүкен сөрелеріндегі сүттің 80 пайызы импортпен келіп отырғанын, сондай-ақ, жерді алып, игермей, пайдаланбай жүргендер өңірдің аргоөнеркәсібінің дамуына кедергі болып отырғанын айтты.
Жымпиты ауылдық округінің әкімі Мирам Қайырғалиев, «Байер Қаз» ЖШС-нің аймақтық өкілі, ауыл шаруашылық ғалымдарының кандидаты Алдаберген Нұғманов, облыстық экономика және бюджеттік жоспарлау басқармасының бөлім басшысы Райса Еркеғалиева, «Шыңғырлау-1» ауыл шаруашылық кооперативінің төрағасы Нұрлыбек Қалиев, облыстық кәсіпкерлер палатасының директоры Нұржан Мақсотов баяндама жасап, өз саласы бойынша тәжірибелерімен бөлісті.
Семинар-кеңестен соң Сырым ауданы әкімі Төлеген Төреғалиев облыс әкіміне «Сырым» МКК-нің тарифтік смета бойынша шығындары туралы слайд көрсетті. Аудандық мәслихат депутаты, Сырым Датұлы атындағы тарихи-өлкетану музейінің директоры Айнагүл Ойшыбаева күрделі жөндеуден өткен қос қабатты музей ғимаратын заманауи жабдықтау үшін қаржы қажеттігін айтты.
Шынар Молданиязова,
Сырым ауданы
Zhaikpress.kz
