Жуырда қол күресінен жас жеткіншектер, жасөспірім ұлдар және қыздар, жастар арасында қол күресінен Батыс Қазақстан облысының чемпионаты өтті. Орал қаласы және барлық аудандардың спортшылары қатысқан жарыста Жаңақала ауданының спортшылары жақсы нәтиже көрсетіп, жеңімпаз атанып, жүлделі орындардан көрінді.
60 кг салмақ дәрежесінде Ержан Бақтыгереев І орынды қанжығасына байлап, спорт шеберлігіне үміткер атағын иеленді. 75 кг салмақ дәрежесінде Самғат Саматов ІІ орын және +75 кг салмақта Ғасырхан Жәрдем ІІІ орынды қанағат тұтты.
Қыздар арасында сынға түскен 55 кг салмақ дәрежесінде Нұрсана Шакрикова ІІ орынға ие болды.
- Орал қаласы және барлық аудан спортшылары қатысқан дүбірлі додада Жаңақала спортшылары жақсы нәтижеге қол жеткіздік. Осы жарысқа қатысуымызға қолдау білдірген Жаңақала аудандық мәдениет, тілдерді дамыту, дене шынықтыру, спорт бөлімінің басшысы Талғат Жанболатұлына қатысқан жастардың және өзімнің атымнан алғыс білдіреміз. Жарыс жоғары деңгейде өтті. Ұйымдастырушыларға, жаттықтырушыларға және гір спорты мен қол күресі федерация президенті Мұрат Қолғанатұлына алғысымды білдіремін. Төккен тердің үміті ақталды, – дейді бапкер Жалғас Нығметов.
Аудан намысын абыроймен қорғап жүрген спортшылардан толағайлы жетістіктер күтеміз.
Арайлым Айденова,
Жаңақала ауданы
zhaikpress.kz
