Күні кеше «Nur Otan» партиясының кезектен тыс XXII съезі өткен болатын. Бұл съезде 7 бағытта партияны жаңғыртудың бағдарламасы көпшілік назарына ұсынылды. Осы орайда бүгін Партия төрағасы Қасым-Жомарт Кемелұлы Тоқаевтың «Nur Otan» партиясының кезектен тыс XXII съезінде берген тапсырмаларын талқылау және орындау мақсатындағы партия активі өтті. Жиынға «Amanat» партиясы Шыңғырлау аудандық филиалының төрағасы Ә.Мұханбетжанова, саяси кеңес мүшелері, фракция мүшелері, бастауыш партия ұйымының төрағалары, партия белсенділері, БАҚ өкілдері қатысты.
Активтің күн тәртібіне сәйкес «Nur Otan» партиясы кезектен тыс ХХІІ съезінің шешімдерін талқылау мәселесі қаралды.
Жиында «Amanat» партиясы Шыңғырлау аудандық филиалы төрағасының бірінші орынбасары А.Тағаниязов: «Мемлекет басшысы – Партия төрағасы біздердің алдымызға маңызды міндеттер мен тапсырмалар қойды. Осыған орай, Сіздердің бастарыңызды қосып, осы шараларды талқылау мақсатында партия активін шақыруды жөн көрдік», - деп басқосудың басты мақсатына тоқталып өтті.
Одан кейін партия ардагері Адақ Шотпанов қазақ халқы аманатқа ешқашан қиянат жасамаған халық дей келе, «Nur Otan» партиясының «Аманат» деп өзгеруін қолдайтынын баса айтты. "Ақбұлақ" бастауыш партия ұйымының төрайымы С.Байтенова халықпен кері байланыс орнату мақсатында әр округке жауапты депутатты бекітіп, тұрғындармен жиі кездесу ұйымдастырылса деген ұсынысын жеткізді.
Жиын соңында «Amanat» партиясы Шыңғырлау аудандық филиалының төрағасы Әлия Биғазықызы актив мүшелеріне бірқатар тапсырмалар берді. Атап айтқанда, бастауыш партия ұйымдарының жұмысын жандандыру, бастауыш партия ұйымдары қатарына жастарды, белсенді азаматтарды тарту, мәслихат жанынан қабылдау бөлмесін ашу, партия жанындағы қоғамдық кеңестер санын 5-ке дейін азайту секілді талаптарды ортаға салды.
Аман Ізмұхан,
Шыңғырлау ауданы
zhaikpress.kz
