Сырым ауданы Жымпиты ауылында қазақ күресінен жасөспірімдер арасында облыс чемпионаты ұйымдастырылды. Өңірдің барлық аудандары мен облыс орталығынан келген үздік палуандардың басы қосылған байрақты бәсеке жоғары деңгейде өтті.
Үздіктердің үздігі қатысқан боз кілем бәсекесінде бәйтеректік спортшылар да бой көрсетті. Нәтиже жаман емес. Жалпы аудан палуандары екі үшінші, бір екінші және бір бірінші орын иеленді.
Алдымен 70 келіде белдескен дарияндық Ғалымжан Еркашев пен 65 келі тартатын палуандар бәсекесінің көркін қыздырған трекиндік Ерасыл Фрунзе облыс чемпионатының қола жүлдегері атанса, 82 келіде бақ сынаған тағы бір дарияндық өрен Әлихан Сариев күміспен күптелді. Ал финалда Дариян палуанын жеңген трекиндік Әділ Қалимолла облыс чемпионы атанды.
Жас жеткіншектерді жарысқа дайындап, бабын келтіріп жүрген Наурызбек Сәпиев пен Орынтай Жангерей атты бапкердердің еңбегі орасан. Енді аудан палуандары басқа да жарыстарда жүлде салуды көздейді.
Түгелбай Бисен,
Бәйтерек ауданы
zhaikpress.kz
