Бүгін Қаратөбе ауданының Жусандыой ауылдық округінің орталығындағы мәдениет үйінде қоғамдық қабылдау өтті.
БҚО білім басқармасы басшысының орынбасары Абат Ашық, «АМАNAT» партиясы БҚО филиалының партиялық бақылау инспекторы Афиза Семғалиева, ауыл тұрғындары алдында сөз сөйлеп, облыс көлемінде білім саласында және аталмыш партияның бағдарламаларына сай атқарылып жатқпн жұмыстарға тоқталып өтті.
Абат Сәкенұлы биыл Ханкөл ауылында мектеп салынатындығын айтып, округ тұрғындарын қуантты.
Аудандық мәслихаттың депутаты Ирина Классен ауылдық дәрігерлік амбулаторияға жаңа көлік қажет деген ауыл халқының аманатын жеткізді.
– Ауыл тұрғындарының алдына келіп отырған негізгі мақсатымыз - жергілікті халықтың көкейінде жүрген өтініштері мен ой-пікірлерін тыңдау, - деді қоғамдық қабылдауға байланысты өткен жиналысты алғысөзімен ашқан аудан әкімі Қадыржан Сүйеуғалиев.
Аудан әкімі Қадыржан Орынбасарұлы, БҚО білім басқармасы басшысының орынбасары Абат Сакенұлы, «АМАNAT» партиясы БҚО филиалының партиялық бақылау инспекторы Афиза Болатқызы және аудандағы бөлімдер басшылары Нұржан Сахипов, Мербол Есендосов, Нұрбол Бозов, Берікжан Ғарапшиев, Жанаргүл Жылқышиева, «АМАNAT» партиясы аудандық филиалының атқарушы хатшысы Абат Зейнуллин ауыл тұрғындарын қабылдады.
Қоғамдық қабылдауда болған 15 ауыл тұрғыны өздерінің ойында жүрген елдік мәселелермен қатар жеке жұмыстары бойынша өтініш-тілектерін жеткізді.
Қабылдауда болған ауыл тұрғындарының өтініштерінің дені жол мәселесіне қатысты болды. Сонымен қатар грант алып, кәсіп ашу, мал азығы шөптің қымбаттығы, ақылы қоғамдық қызметке қабылдау сынды мәселелер қойылды.
– Ауыл тұрғындарын көптен мазалап келе жатқан өзекті мәселе жолдың қиындығы. Дірілдеген жолдан көлік тозып, жолаушының да діңкесі құриды. Жолдың қолайсыздығынан аутокөлігіміз жиі сынады. Қазір көліктің қосалқы бөлшектерінің бағасы өте қымбат. Амал жоқ, көліксіз ешкайда бара алмайсын, сондықтан шамамызға қарай сатып алып жүрміз, - дейді қабылдауға келген ауыл тұрғыны Самғат Айғожин.
Ерболат Райсов,
Қаратөбе ауданы
zhaikpress.kz
