Бөкей ордасы ауданының қайта құрылғанына 50 жыл толуына орай ғылыми конференция өтуде. Маңызды шараға М.Өтемісов атындағы БҚУ-нің тарих кафедрасының доценті, тарих ғылымдарының кандидаты Бақтылы Боранбаева, М.Мәметова мемориалдық музейінің меңгерушісі Ахмедияр Батырханов, өлкетанушы, "Ғылыми зерттеулерді қолдау" қорының директоры Айболат Құрымбаев, Жәңгір хан атындағы БҚАТУ "Рухани жаңғыру орталығының" аға оқытушысы, тарих ғылымдарының кандидаты Есқайрат Хайдаров арнайы келді.
Шара Кеңес одағының батыры Мәншүк Мәметованың ескерткішіне гүл шоқтарын қоюмен басталып, мәдениет үйінің фойесінде ұйымдастырылған кітап көрмесін тамашалаумен жалғасты.
Ғылыми конференция шымылдығы аудан әкімі Нұрлыбек Даумовтың сөзімен ашылды.
– Орда тарихын тереңнен алған қасиетті мекен. Астындағы тағы үшін емес, халқының бағы үшін қызмет еткен хан Жәңгірдің реформасы, Ұлы Отан соғысы жылдарындағы Орда тарихы, Нарын полигоны мен мәжбүрлі түрде атамекендерінен қоныс аударған ордалық азаматтардың налалы тағдыры - том-том кітапқа тақырып боларлық дүние. Өткенсіз болашақ бұлыңғыр. Еліміз еңселі болу үшін ата тарихымызды дәріптеуіміз керек. Бүгінгі шара сол талпынысымыз болмақ, - деді өз сөзінде.
Ғылыми конференция музей-қорықтың маманы Мира Құтышеваның баяндамасымен басталды. Мира Ерболатқызы Орда ауданының 1972 жылдан бергі бар тірлігін, әр саланың айтулы тұлғалары туралы тұшымды баяндама жасады.
М.Өтемісов атындағы БҚУ-нің тарих кафедрасының доценті, тарих ғылымдарының кандидаты Бақтылы Боранбаева 1952 жылғы мәжбүрлі түрде көшкен ауылдастар тағдыры, қасіретті депортация тақырыбын сөз етсе, Жәңгір хан атындағы БҚАТУ "Рухани жаңғыру орталығының" аға оқытушысы, тарих ғылымдарының кандидаты Есқайрат Хайдаров "Орда ауданы байларының 1928-32 жылдарындағы ұйымдастыру саясатына наразылықтары" тақырыбын баяндамаларына арқау етті.
Өлкетанушы, "Ғылыми зерттеулерді қолдау" қорының директоры Айболат Құрымбаев "Депортация: Бөкей ордасы тарихындағы ақтаңдақтары", М.Мәметова мемориалдық музейінің меңгерушісі Ахмедияр Батырханов "Ұлы Отан соғысы тағдыр тәлкегіне түскен ордалық оғландар" тақырыбында баяндама жасады.
Конференцияда осы кезге дейін беймәлім боп келген тарихи ақтаңдақтар айтылды. Жарыссөзде сөз алғандар ата-тектеріне қатысты жеке сұрақтарын қойса, Надежда Такирова ауданның қайта құрылғанына 50 жылдық тарихында аттары аталатын азаматтарды ескеруді сұраса, Тілеген Арыстанбеков аудан тарихын одан әрі де тереңнен қаузап, ауданға "Қаһарман аудан" атағын бергізуге жұмыстану керек деді. Еңбек ардагері Жаңбырбай Камалов осындай шараны ұйымдастырушыларға ризашылығын білдірді.
Ұлпан Әнуарқызы
Бөкей ордасы ауданы
zhaikpress.kz
