Шыңғырлау аудандық орталық кітапханасында «Рухани жаңғыру» бағдарламасының 5 жылдығына орай «Сарқылмас рухани әлем ғажайыптары» атты библиотүн шарасы ұйымдастырылды.
Шараға аудан әкімі Ә.Мұханбетжанова, мекеме, бөлім қызметкерлері, аудан жастары мен кітапхананың тұрақты оқырмандары қатысты.
Кітапхана мен оқырман арасындағы байланысты нығайту, оқырманның жас ерекшелігі, қызығушылығына орай әр оқырманға айырықша көңіл бөлу, кітапхана қорындағы ұлттық құндылықтарды дәріптеу, ел руханиятын көтерген ұлы тұлғалардың шығармаларын насихаттау мақсатында оздырылған кітапханалық түнде кітап көрмелері, әдеби шығармалардан көріністер, ұлттық ойындар секілді шаралардың бәрі болды. Мәселен, кітапхананың тұрақты оқырманы Айдарбек Байтенов көрініс барысында Абай ақынның бейнесін сомдап, Арқадан келген атақты Біржан Салды қонақ еткен сәттерін шебер көрсете білді. Көрініс «Желсіз түнде жарық ай» атты лирикалық этюдке ұласты. Шара барысында Абайдың өлеңдері мен қара сөздері оқылып, әндері айтылды. Кітапхананың тұрақты оқырмандары Абай Құнанбайұлының әндерін орындады.
Бұл қазақ туындысы насихатталған шара болса, кітапхананың келесі залында, яғни сиқырлы салонында (комьюнити орталығында) оқырмандарды ғажайып әлемге жетелеген әйгілі «Гарри Поттер» туындысы желісімен әдемі шара өтті. Аталмыш кітаптағы сиқырлы мектептің профессоры Сивилла Трелони образындағы жетекші оқырмандарға үш кезеңнен тұратын кештің сұрақтарымен таныстырумен қатар, оқырмандардың көп іздеп, оқылатын кітаптарын талқыланды.
Ал, әдістемелік библиографиялық бөлімінде «Бабалар үні» атты библиокафе кешінде ұлтымыздың тарихы мен мәдениеті, салт дәстүр, мақал-мәтел, ұлттық ойындар, ұлттық тағамдар түрлеріне бағытталған кітаптарына шолу жасалса, балалар кітапханасында «Жайықтың әдеби жауһарлары» тақырыбында әдеби карта Ақжайық ақын-жазушылары жайында ақпарат берілген болатын.
Г.Бердегалиева,
Шыңғырлау аудандық орталықтандырылған кітапхана жүйесі директорының орынбасары
