Жуырда Ұлы Жеңістің 77 жылдығы, сонымен қатар Ұлы Отан соғысының ардагері Есен Орақбаевтың 100 жылдық мерейтойына орай Жаңақала ауданы Қызылоба ауылдық округінде дала қызықтары ұйымдастырылды.
Алдымен аудан басшысы Дархан Закарин, ауыл ақсақалдары батырдың бейітіне барып Құран оқыды. Содан соң 2001 жылғы түлектер салып берген мәңгілік алау жанында батыр атамызды еске алуға арналған гүл шоқтарын қою рәсімі өтті.
Кейін дала қызықтары басталып, оған аудан әкімі Д.Әмірханұлы бастаған ауыл тұрғындары мен қонақтары қатысты. Алдымен 5 айналымнан тұратын 15 шақырымдық аламан ат бәйгесінің соңғы айналымында алдына қара салмай мәре сызығын алғашқы болып кескен Ерболат Айтқалиевтің сәйгүлігі І орынды қанжығасына байлады. Нұрболат Әдиетовтың бозжорғасы ІІ орын алса, Жәнібек Сүлейменовтың аты ІІІ орынды олжалады. Үш айналымнан тұратын 9 шақырымдық топ жарыста Иман Қарағойшиннің жорғасы І орынды еншілесе, Нүрлан Дабысқалиевтің арғымағы ІІ орынды, Нұрлан Жұмағазиевтің тұлпары ІІІ орынды иеленді.
Жаяу жүгірістен Қолғанат Ғайнуллин (Жаңақала ауылдық округі) мәре сызығын бірінші болып кесіп жеңімпаз атанса, Тимур Бақтыгереев ІІ орын, Әлішер Мирасов ІІІ орынды иеленді.
Қой көтеру бойынша Арнұр Болатов (Бірлік ауылдық округі), Дәуренбек Өтепов (Жаңақала ауылдық округі), Армат Тасқайыров (Қызылоба ауылдық округі), Ақжол Әділғалиев (Жаңақала ауылдық округі) қой олжалады.
Қол күресі бойынша 70 келіге дейінгі салмақта Мэлс Нұрманғалиев (Бірлік ауылдық округі) І орынға ие болса, Нұрберген Қарабалиев ІІ орын, Данияр Шайхин ІІІ орынды еншіледі. +70 келі салмақ бойынша Дулат Рахатов (Жәнібек ауданы) жеңіске жетсе, Ренат Қамен (Ақжайық ауданы) ІІ орын, Нұрлыбек Жағыпаров ІІІ орынды иеленді. Кермеге тартылу бойынша Елнұр Абайұлы (Бірлік ауылдық округі) І орынды иеленсе, Ерасыл Базарбай (Пятимар а.оокругі) ІІ орын, Нәсиолла Сағынов (Пятимар ауылдық округі) ІІІ орын алды.
Гір тасын көтеру бойынша Алпамыс Айтмұқанов (Атырау облысы) жеңімпаз атанса, Темірлан Хафизов (Қызылоба ауылдық округі) ІІ орын, Жасқанат Сыралиев (Жаңақала ауылдық округі) ІІІ орынды еншіледі. Арқан тартыстан Пятимар ауылдық округі І орын, қызылобалық жігіттер ІІ орын, Бірлік ауылдық округі ІІІ орынға ие болды. Қазақ күресі бойынша Қанат Дінқуатов өгіз палуан атанып жеңіске жетсе, Дәуренбек Өтепов (Жаңақала ауылдық округі) ІІ орын, Нұрхат Сармулдин ІІІ орынды иемденді. Ақжол Әділғалиев (Жаңақала ауылдық округі) түйе палуан атанып жеңіске жетсе, Иса Төлегенов (Жаңақала ауылдық округі) ІІ орын, Ерсұлтан Сапарғали (Ақжайық ауданы) ІІІ орын алды. Жеңімпаздар мен жүлдегерлерге ақшалай сыйақы беріліп, арнайы дипломдар табыс етілді. Түс мезгілінде Есен Шегрейұлы Орақбаевтың ұрпақтары еске алуға арналған дастархан жайып, ас берді.
Райхан Амантайқызы,
Жаңақала ауданы
zhaikpress.kz
