Орталық Азиядағы көшбасшы, еліміздегі беделді жоғары оқу орындарының бірі - Сүлеймен Демирел атындағы университет жақында SPT (SPT-мектеп және колледж түлектеріне арналған осы университеттің олимпиадасы) олимпиадасын өткізді. Университет биылғы мектеп түлектеріне 264 грант бөлді.
Онлайн, оффлайн сипатында оздырылған олимпиада сегіз таңдау пәні бойынша өтті. Бұл білім бәйгесіне 7000-нан астам ұл-қыз қатысты. Әр таңдау пәні бойынша үш оқушыға 100%-дық грант бұйырды. Барлығы 24 түлек аталмыш университетте 4 жыл тегін оқу мүмкіндігіне ие болды. Оралдағы Әлия Молдағұлова атындағы №38 мектеп-лицейінің 11 «б» сынып оқушысы Аида Ғинятова олимпиадаға қатысып, грант иегері атанды.
– Өзімнің грант иегері атанғанымды естігенде бірден сене қойған жоқпын. Жағымды жаңалық тек мені емес, отбасымды, достарымды, мектеп мұғалімдерін – баршамызды қуантты. Сүлеймен Демирел атындағы университет ректоратына осындай тамаша мүмкіндік бергені үшін алғыс айтамын. Алайда Ұлттық бірыңғай тестілеуді де тапсырып, өз бағымды сынап көрмекшімін, – дейді грант иегері Аида.
Гүлнәр Шәңгерей,
zhaikpress.kz
