Бар өмірін спортқа арнаған теректілік Өтеген Мүбарак республикалық «Спорт жұлдыздары» журналының атынан «Ардагер спортшы» куәлігімен және төсбелгісімен марапатталды.
Сонымен қатар таяуда ғана ұстаздар арасында асық атудан 50-59 жас аралығында ұйымдастырылған республикалық жарыста І орынды иеленіп, ҚР Асық ату федерациясының президенті, Қазақстанның еңбек сіңірген жаттықтырушысы Жомарт Сабыржановтың алғыс хатын алды.
Жас ұрпаққа ұлттық спортымыз - асық ату мен бес асықты насихаттап, шәкірттеріне патриоттық тәрбие беру жолында мінсіз қызмет атқарып жүрген Өтеген Ғабдолұлы – жан-жақты спортшы. Мәселен, қол күресінен және шахматтан облыс орталығында өткен чемпионатқа қатысып, ІІІ орынды қанжығасына байлады. Шыңғырлау ауданында асық атудан және бес асықтан ерлер мен әйелдер арасындағы БҚО чемпионатында І орынды еншілеген ол Орал қаласында өтетін ҚР чемпионатына қатысуға жолдама алды.
Әрдайым өз ісіне жауапкершілікпен қарап, шәкірттерінің жетістікке жетуіне атсалысып жүрген Өтеген Ғабдолұлына жеңісті күндеріңіз көп болсын дейміз.
Аяулым Бақтығали,
Теректі ауданы
zhaikpress.kz
