Бүгін дала реформаторы, ұлт-азаттық көтерілістің көсемі, халық батыры Сырым Датұлының 280 жылдығы мен Алаш қайраткері, Алашорда үкіметінің батыс бөлімшесінің төрағасы Жаһанша Досмұхамедовтың 135 жылдығына арналған “ Театр – ұлт рухының тірегі” атты облыстық халықтық театрлар фестивалінің ашылу салтанаты өтті.
Салтанатты ашылу рәсіміне аудандық мәслихат хатшысы Шынар Дүйсенғалиева, аудандық мәдениет, тілдерді дамыту және спорт бөлімінің басшысы Ерлан Сәрсенов қатысып, қонақтарға “қош келдіңіз” айтты.
Аталмыш шарада сырымдық “Бұлан”, бөрлілік “Мұрагер”, “Казталов”, “Қаратөбе”, “Тасқала” халық театрлары мен оралдық “Алтын орда” балалар мен жасөспірімдер қоғамдық театры өнер көрсетпек.
Театрлар көзі қарақты көрерменге “Дариға жүрек”, “Жас”, “Қуыршақ”, “Жарық”, “Тозақ шеңбері”, “Мен ояндым” секілді бірқатар поэтикалық моно драмалар ұсынбақ.
Қонақтарға арнайы кофе-брейк ұсынылып, артынша еркін форматтағы баспасөз конференциясы өтті.
Айта кетейік, көрермен көңілінен шыға білген, образды тиісті деңгейде сомдай білген театрларға Сырым Датұлы мен Жаһанша Досмұхамедов атындағы арнайы жүлде табысталатын болады.
Ал, аталаған театр ұжымдары түстен кейін Сырым аудандық мәдениет үйінде өнер көрсететін болады.
Айжан Бауыржанқызы,
Сырым ауданы
zhaikpress.kz
