Халықаралық қарттар күні мен мейірбандылық айлығы аясында Теректі ауданы алғашқылардың бірі болып облыс орталығындағы Қарттар мен мүгедектерге арналған жалпы үлгідегі Орал медициналық-әлеуметтік мекемесінде болды.
Аудан әкімінің орынбасары Дамир Гумаров, Теректі аудандық жұмыспен қамту және әлеуметтік бағдарламалар бөлімі басшысы Арайлым Тасенова, аудандық мәдени-демалыс орталығы директоры Арман Сағидоллин бастаған топты, теректілік өнерпаздар қостады.
Аталмыш мекемеде тату-тәтті түрлі ұлт өкілдері өмір сүруде. Теректі ауданынан 13 адам қамқорлыққа алынған. Аудан басшысының орынбасары Дамир Сансызбайұлы шара басында сөз алып, концерттік бағдарламаға жиналғандарды мерекемен құттықтап, Теректі ауданы әкімі Тілек Габдушевтің сәлемін жеткізді. Сонымен қатар, мекемеге микротолқынды пеш сыйға тартты.
Одан кейін барша қарияларға аудан өнерпаздары ән салып, керемет көңіл күй сыйлады. Теректілік таланттар Дәурен Жұмағалиев, Әлия Шин, Злиха Қалмағамбетова, Айбек Дәулетқалиев, Қайрат Сағидуллин, Шайзада Елжанова, Виктория Нуралиева, Елжас Мағзом, Гүлнара Қабиева және еліміздің сүйіктісіне айналып үлгерген Сұлтан мен Бейбарыс Ғарифуллиевтердің өнеріне қошемет ерекше болды.
Қарттар мен мүгедектерге арналған жалпы үлгідегі Орал медициналық-әлеуметтік мекемесі директорының орынбасары Армат Байғазиев сөз сөйлеп, Теректі ауданы өкілдеріне алғыс білдірді.
Шара соңында теректілік қарияларға дастархан жайылды.
Әділет Әлібекұлы,
Теректі ауданы,
zhaikpress.kz
