Жуықта Казталов аудандық С.Садықов атындағы мәдени-демалыс орталығында халықтық «Гүлдерайым» және «Ардагерлер әуені» хор ұжымдарының 1 қазан — Халықаралық қариялар күніне арналған «Қарттарым асыл қазынам» атты концерті өтті.
Концерттік бағдарлама әжелер ансамблінің орындауындағы халық әні «Гүлдерайым» әнімен ашылды. Облыстық, республикалық, халықаралық байқауларда топ жарып аудан мақтанышына айналған «Ардагерлер әуені» хор ұжымы мен әжелер ансамблі халық көңілінен шығар ән-күйлерін көрермен назарына ұсынды.
Халық әні «Хәләулім», акопеллалық орындаудағы «Дүние керуен» әндерімен жалғасқан концерт тыңдарман жанын жадыратты. Қазақстан полициясына - 30 жыл, Қазақстан ішкі істер министрлігінің ардагерлер ұйымына 45 жыл медалінің иегері, полиция ардагері Қадырбек Балғынов Құрманғазының «Аман бол шешем, аман бол» күйін нақышына келтіре орындаса, республикалық ардагерлер арасындағы өнер байқауының мәнерлеп оқу жанры бойынша І орын жүлдегері Нурия Хабибуллина «Ақ сәулем» моналогын, ақындық жанры бойынша І орын жүлдегері Гүлмай Базартаева «Ауылдасқа тілек» туындысын тебірене оқыды.
Қариялар күніне орай өткізілген концерт соңы «Казталов вальсі» әнімен аяқталды. Концертті дайындаған Халықтық «Гүлдерайым» ансамблінің, «Ардагерлер әуені» хор ұжымының жетекшісі, «Еңбек даңқы» төсбелгісінің иегері Нурия Хабибуллина және сырнайда сүйемелдеуші Өтеген Шоқпанов тыңдарманның зор қошеметіне ие болды. Көрермен көңілін жадыратқан әдемі кеш көпшілікке керемет әсер сыйлады.
Жансая Жұмажанқызы,
Казталов ауданы
zhaikpress.kz
