Оралда М.Өтемісов атындағы Батыс Қазақстан университетінің 90 жылдық мерейтойы аталып өтуде. Шараға облыс әкімі Ғали Есқалиев арнайы қатысып, университет қызметкерлері ұсынған ғылыми жұмыстар мен жобалардың көрмесімен танысты. Мерейтойға арналған шара одан әрі концертке ұласты.
Алдымен университет ұжымын білім ордасының ректоры Нұрлан Серғалиев құттықтады.
- Еуропа мен Азияның жолайғырында тұрған еліміздің батыс өңірі, соның ішінде ежелгі Орал шаһары қай заманда да ақыл-ой мен қоғамдық сананың алғы шебінде болып, уақыттың серпінді құбылыстарын алғашқы болып қабылдап, тез бейімделіп отырды. Жиырмасыншы ғасыр бастауындағы ұлы өзгерістер толқынында жаралып, сол кездің өршіл талғамына сай құрылған білім ордасы. Қызметін елге білім нұрын тарататын зиялы шәкірттер тәрбиелеуден бастаған ұлағатты ұстаздар ұясы. Құрылып, қызметін бастаған күннен бастап ғылым мен білімнің қайнар көзіне, халық ағарту саясатының қозғаушы күшіне айналған білім ордасы бүгінде кадрлар ұстаханасы ғана емес, шәкірттері төрткүл дүниеге әйгілі атышулы жоғарғы мектеп, ақыл-ойдың зергерлері, ілім-білімнің тұңғыштары ғылымға түрен салған қасиетті қара шаңырақ. БҚУ – бүгінде халықаралық қауымдастықтан ойып орын алған білім ордасы. Қазіргі таңда университетте 17 - ғылым докторы, 131- ғылым кандидаты, 10-РһD философия докторы, 159 - магистр қызмет атқарады. Торқалы тоқсан жылдық құтты болсын! Білім ордасының дамуы мен өркендеуі үшін қосқан үлестеріңізге мың алғыс! Әрбір шаңыраққа бақ, береке, бірлік тілеймін, - деді Нұрлан Хабиболлаұлы.
Шарада облыс әкімі Ғали Есқалиев өңірдегі іргелі оқу орны қызметкерлерін мерейтоймен құттықтап, бәсекеге қабілетті университеттің мамандарын атап өтті. Ұлт мүддесі үшін еңбектеніп жүрген мамандарға алысхат табыстады.
- Батысқазақстандық жастарға ғана емес, еліміздің түпкір-түпкірінен келген қаншама жасқа білім, тәрбие беріп келе жатқан Қазақстанның ең көне университеттерінің бірі – Махамбет атындағы Батыс Қазақстан Университетінің 90 жылдық мерейтойымен шын жүрегімнен құттықтаймын! 1932 жылдан бастап бүгінге дейін үлкен тарихи жолдан өткен қасиетті қара шаңырақ өзіндік брендін қалыптастырып, еліміздегі жоғарғы оқу орындар ішінен ойып тұрып орын алды. Бүгінде университет түлектері түрлі салада табысты еңбек етіп, еліміздің өркендеуіне сүбелі үлес қосып жүр. Батыс Қазақстан Университеті өзіндік дәстүрлері мен құндылықтарын қалыптастырған білім ордасы. Бұл ең алдымен қазақ ғылымының көрнекті тұлғалары биология ғылымдарының докторы, профессор Всеволод Иванов, математик-ғалым Асан Тайманов, филология ғылымдарының докторы Мәтжан Тілеужанов сынды корифейлер қалдырған асыл мұра деуге болады. Алдағы уақытта да ел игілігі үшін қалтқысыз қызмет ете беретіндіктеріңізге сенімдімін! Жемісті еңбек тілеймін, - деді облыс әкімі.
Марапат алған оқытушылар қатарында Талшын Дарбаева, Владимир Салов, Махамбет Ержанов, Мұрат Сыдықов, Галина Нестеренко, Айгүл Медешова, Ольга Полянина, Рита Сұлтанғалиева, Еркін Нұрымбетов, Максим Попов бар.
Динара Насыр,
Суретке түсірген автор
zhaikpress.kz
