Өңірлік қолбасшылықтың басқармасында қорытынды тексеріс дәстүрлі түрде саптық байқаудан басталды. Онда арнайы құрылған комиссия мүшелері әскери қызметшілердің сыртқы келбетін, жалпы әскери жарғыны білуін, саптық дайындықты, сондай-ақ саптық әндердің орындалу деңгейін тексерді.
Басқарма офицерлері қорытынды тексеріс барысында саптық және мемлекеттік - құқықтық дайындық, атыс өнер және дене дайындығы, әскерлерді басқару және жалпы әскери жарғы бойынша сынақ тапсырды. Сынақ барысында негізгі пәндерді тапсыру тестілеу әдісімен жүргізілді, онда әскери қызметшілер басқару құжаттарының талаптары мен өздерінің лауазымдық міндеттерін білу бойынша сұрақтарға жауап берді.
"Сұңқар" оқу-жаттығу орталығында өңірлік қолбасшылық басқармасының әскери қызметшілері атыс даярлығы бойынша нормативтерді орындады. Жеке құрамнан атыс дайындығы бойынша сынақ қабылданып және қарумен жұмыс істеу кезіндегі қауіпсіздік талаптары бойынша білімдері тексерілді. Әскери қызметшілер атыс шебінде Калашников автоматы мен Макаров тапаншасынан ату жаттығуларын орындап үздік нәтижелер көрсете білді. Сонымен қатар, басқарма офицерлері қару-жарақты, толық емес бөлшектеу және қайта жинау бойынша нормативтерді орындады.
- Қорытынды тексеру кезінде әрбір әскери қызметшінің міндеті - жоғары нәтиже көрсету. Тексеру барысында басқарма жеке құрамы ұйымшыл әрекет етіп, жақсы физикалық дайындықтарын көрсете білді, - деді "Батыс" өңірлік қолбасшылығының қолбасшысының орынбасары, полковник Павел Ситников.
Қорытынды тексеру - жыл сайын оқу жылының соңында жауынгерлік дайындықтың деңгейін бағалайтын тексеріс. Бұл жыл сайын Қазақстан Республикасының барлық Қарулы Күштерін қамтитын ауқымды іс-шара.
Айта кетейік, қазан айының соңына дейін «Батыс» өңірлік қолбасшылығына қарасты барлық әскери бөлімдер қорытынды тексеріс тапсыратын болады.
Капитан Ертуған Әубакир
