Қаратөбе аудандық жастармен жұмыс жөніндегі ресурстық орталығының ұйымдастыруымен «Желбіресін көк байрағы халқымның, Тәуелсіздік болсын мәңгі тірегім!» атты ауданның жас ақындарымен кездесу кеші өтті.
Жастарды жерлес жас ақындардың шығармашылығымен таныстырып, патриоттық рух беріп, адамгершілік қасиеттерге баулу, ақын өлеңдері арқылы халқына, ана тіліне, Отанға деген сүйіспеншілік сезімдерін оятуды мақсат еткен кеште шығармашылық бағытта қызықты әңгімелер өрбіді. Жылы жүзді, дархан жүректі ақындардың ғибратты әңгімесінен қатысушылар ерекше әсер алды.
Шараға «Ақберен» жас ақындар мектебінің түлектері Ақылбек Амантай, Меңдіқожа Ғабдолов, Соналы жалпы орта білім беретін мектебінің директоры Еркінғали Жұбанов, «Балалар жылы» аясында алғаш өткізілген «Біз – тәуелсіз ел ұланы, болашаққа үн қосқан» тақырыбындағы оқушылар арасындағы аудандық ақындар айтысының бас жүлдегері Досқан Бекболатұлы және жүлделі І орын иегері Абай Азамат қатысты.
Кездесуде жастар Қазақстан Республикасы Ақпарат саласының үздігі, Қазақстан Журналистер одағының мүшесі, өңірімізге танымал Ертай Бимұхановпен Zоом платформасы арқылы онлайн жүздесіп, терең сырға, ұшқыр қиялға толы өлеңдерін тыңдады.
Ақынын құрметтеген жастар қара сөзден қамшы өрген ақындарға ерекше ықылас танытты. Сырлы сұқбатқа толы болған әсерлі кеште жастар ақындардың өмірі мен шығармашылығы, адами болмысы мен рухани әлемімен жақын таныса алды. Өлең десе ішкен асын жерге қоятын жастар ақындардың жүрегін жарып шыққан жырларын тыңдап, рухани сусындап қайтты.
Ақындар өз кезегінде жиналған қауымға ризашылығын білдіріп, жастар ордасына ақ тілегін арнап, тәуелсіздік, туған жер, ана, махаббат тақырыптарында өлеңдерін оқып берді.
Шара соңында Қаратөбе аудандық ішкі саясат бөлімінің басшысы Нұртас Сафуллин сөз сөйлеп, қатысқан ақындарға алғысын айтып, сый-сияпат табыстады.
Райымбек Абай,
Қаратөбе ауданы
zhaikpress.kz
