Кеше С.Садықов атындағы мәдени-демалыс орталығында Казталов ауданы әкімінің «Жыл үздігі – 2022» жастар сыйлығы байқауының салтанатты марапаттау рәсімі өтті.
Салтанатты рәсім басталмас бұрын аудан жастарының жыл ішінде атқарған жұмыстары мен жеткен жетістіктері жайындағы арнайы бейне көрсетілім көпшілік назарына ұсынылды. Бейне көрсетілімнен соң салтанатты шараны ашу үшін сөз кезегі аудан әкімнің орынбасары Зәйлім Мәжитоваға ұсынылып, сахна төріне шақырылды. Жастардың қоғамдағы рөлі мен мемлекет дамуындағы жетекші орнына тоқталған Зәйлім Мәжитова бірқатар аудан жастарына аудан әкімінің алғыс хатын салтанатты түрде табыс етті.
Туған елі мен жеріне өз қолтаңбасын қалдырып, қоғамның әр саласында жемісті еңбек етіп келе жатқан жастар арасынан келесі аталымдар бойынша үздіктер анықталды. Алпамыс Кенжебекұлы Кәкім — «Үздік жас ұстаз», Ғазиза Әнуарқызы Мусина — «Үздік жас дәрігер», Асылбек Ғайноллаұлы Әбуов — «Үздік жас кәсіпкер», Ернұр Ержанұлы Ержан — «Үздік жас спортшы», Мұрат Қазбекұлы Ахметов — «Үздік жас мәдениет қызметкері», Жұлдыз Асхатқызы Жүсіпова — «Үздік жас мемлекеттік қызметкер», Жансая Жұмажанқызы Баянова — «Үздік жас тілші», Раушан Ғарифоллақызы Ғаббасова — «Үздік жас әлеуметтік қызметкер», Нұрлан Табылдыұлы Табылдиев «Үздік волонтер», Бексұлтан Жасталапұлы Ғилым — «Үздік Жастар ресурстық орталығының қызметкері», Жалғасбек Балтабайұлы Жүсіпов пен Ахияр Набиоллаұлы Исмағұлов «Жыл жаңалығы» аталымдарымен марапатталып, «Қосөзен» құрамасы — «Үздік оқушы — 2022» атағын жеңіп алды.
Салтанатты шарада ауданның өнерпаз азаматтары әсем әндерден шашу шашып, мың бұрала би билеп көпшілік көрерменге мерекелік көңіл күй сыйлады.
Арманы биік, мақсаты айқын, жетістік жолына жаңаша көзқараспен қадам басқан жыл үздіктерінің бұданда биік белестерді бағындырарына бек сенімдіміз.
Жансая Жұмажанқызы,
Казталов ауданы
