Сырым ауданының орталығы Жымпитыдағы аудандық аурухана ғимараты 1978 жылы салынған.
Нысан 2008 жылы күрделі жөндеуден өтті. Басы ауырып, балтыры сыздаған жанның маңдай тірейтін қабырғасы, өмір мен өлімнің, сырқат пен саулықтың ашық айқасатын аренасы қазір азып-тозған күйде. Кәріз жүйесі шіріп бітті. Жеделсаты жоқ. Науқастарды жақындары мен медбикелері үшінші қабатқа зембілмен көтеріп, шығарып жүр.
Бүгін Сырым ауданына жұмыс сапарымен келген Батыс Қазақстан облысының әкімі Нариман Төреғалиев аудандық ауруханаға арнайы соғып, жай-күйімен танысты. Денсаулық үйінде бүгінгі таңда 26 дәрігер, 182 орта буын қызметкер жұмыс жасайды. Орталыққа 15 770 науқас тіркелген. Кадр қажеттілігі күрделі деңгейге жеткен. Атап айтсақ, ауданға дәрігер акушер-гинеколог, дәрігер анестезиолог-реаниматолог, педиатр, хирург, онколог, трансфузиолог-, терапевт, ФГДС маманы керек. Бұдан бөлек, 4 бірдей жалпы тәжірибе дәрігеріне сұраныс бар.
Тағы бір күйіп тұрған мәселе - ауылдарға "Жедел жәрдем" қызметін көрсету үшін 3 жаңа көлік қажет.
Нариман Төреғалиев аурухананың күндізгі стационарын, әкімшілік және қабылдау бөлмелерін аралап көріп, жаңа аппараттармен танысып, күн тәртібінде тұрған - Сырым аудандық ауруханасы ғимаратын күрделі жөндеу мәселесін мақұлдады. Өңір басшысы Батыс Қазақстан облыстық денсаулық сақтау басқармасының басшысы Арман Қалыбековке жобалық - сметалық құжаттарды даярлап, бекітуге ұсынуды тапсырды.
Былтырғы есеп беру кездесуінде аурухана лифт орнату мәселесі айтылған еді. Арман Қалыбековке жобаға жеделсаты да енгізілгенін айтты.
Бауыржан Ширмединұлы,
Фото: Айжан Амангелдина,
Сырым ауданы
zhaikpress.kz
