Жуырда Жаңақала аудандық мәдениет тілдерді дамыту, дене шынықтыру және спорт бөлімінің қолдауымен, аудандық мәдени-демалыс орталығының ұйымдастыруымен «ҚосStar» музыкалық шоуы өтті.
Айта кетейік, әуесқой және кәсіби әнші жұбынан құрылған музыкалық шоу үш кезеңнен тұрады. Шара барысында алдымен өнер бәйгесінде бақтарын сынайтын қатысушылар мен әділ бағасын беретін қазылар алқасы таныстырылды. Аталмыш шоудың алғашқы кезеңі Қырқопа мәдениет үйінің меңгерушісі Ақтолқын Қуанғалиева мен ветеринариялық дәрігер Фарида Ақбасованың орындауындағы «Әнім сен едің» әнімен басталды. Содан соң «Өкінбе сен» әнін мәдени-демалыс орталығының сүйемелдеушісі Қуанышбек Айдарбеков пен қазақ мектебінің аға тәлімгері Ернат Сұпағалиев тамылжыта орындаса, мәдени-демалыс орталығының балалар мен жастар бөлімінің меңгерушісі Айзада Сейтова және Қызылоба ауылының жастармен жұмыс жөніндегі ресурстық орталығының кеңесші маманы Ербол Серікбай «Алтыным-ай» әнін шырқады.
Ауыл мәдениетін көркейтуге сүбелі үлесін қосып жүрген Жаңажол мәдениет үйінің сүйемелдеушісі Құрмет Құспанов және өнерде де өмірдегі де жұбы Гүлшат Құспановамен «Қайдасың?» әнін орындап, көрермен көңілінен шықты. Одан әрі әдістеме бөлімінің меңгерушісі Жанболат Мұсағалиев пен жалпы орта білім беретін мектебінің информатика пәнінің зертханашысы Динара Қуанышқалиева, мәдени-демалыс орталығының балалар мен жастар бөлімінің маманы Мерей Жұмашев пен аудандық кітапхананың кітапханашысы Ақерке Габдуллина, әдіскер-бағдарламашы Анита Қанатова мен аудан әкімі аппаратының бас маманы Аман Серікқалиев, мәдени-демалыс орталығының сүйемелдеушісі Камила Жексенғалиева мен жұбы Жаңақала мектеп-гимназиясының қызметкері Әсем Дүйсеғалиеваның сахналық қойылымдары сәтті шығып, көрерменнің қошеметіне бөленді.
Кеш соңында әділқазылар алқасы бірінші кезеңнің қорытындысы балдық жүйемен есептеп, үміткерлерге келесі кезеңге сәттілік тіледі.
Ару Айдын,
Жаңақала ауданы
zhaikpress.kz
