Жаңақала аудандық спорт кешенінде аудандық «Jastar» спорт клубының ұйымдастыруымен Кеңес әскерлерінің Ауғанстан жерінен шығарылған күніне 34 жыл толуына орай ауған соғысының ардагерлері және ауған соғысында қаза тапқандар Жақсыбек Ғабдуллин, Мағаз Давлетов, Альберт Жанбаев, Махсот Ибрашев және Тілекқабыл Суханкуловты еске алуға арналған волейболдан аудандық жарыс өткізілді.
Бұл жарысқа С.Меңдешев, Жаңажол, Пятимар, Жаңақазан ауылдық округтері және Ә.Жангелдин ЖОББМ, Жаңақала мектеп-гимназиясы, Жаңақала ЖОББМ, №3 ЖОББМ, Жаңақала колледжі, Жаңақала ауданының балалар-жасөспірімдер спорт мектебінің командалары қатысты.
Жарыстың ашылу салтанатына аудандық қорғаныс істер бөлімінің бастығының көмекшісі, запастағы подполковник Абай Мұстафаұлы, спорт ардагері, жанашыры Алихан Досмұхамбетов, аудандық мәдениет, тілдерді дамыту, дене шынықтыру және спорт бөлімінің басшысы Данял Танзенов және аудандық «Jastar» спорт клубының директоры Жанболат Гумаров қатысты.
Жарыс барысында сөз сөйлеген Жаңақала аудандық мәдениет, тілдерді дамыту, дене шынықтыру және спорт бөлімінің басшысы Д.Жұпмағамбетұлы соғыс ардагерлерінің, соғыстан қаза тапқан жауынгерлердің еңбегі зор екендігін айтып өтіп, жарысқа қатысушы командаларға сәттілік тіледі.
Жарыстың қорытындысында Жаңақала ауданының балалар-жасөспірімдер спорт мектебінің командасы жүлделі І орынға ие болып, жеңімпаз атанды. Ал ІІ орынды Жаңажол ауылдық округінің командасы еншіледі. №3 мектептің командасы ІІІ орынға табан тіреді.
«Үздік қорғаушы» номинациясымен Бейімбет Есіркепов (Жаңақала ауданының балалар-жасөспірімдер спорт мектебі), «Үздік байланыстырушы» номинациясымен Ерболат Набидуллин (Жаңажол ауылдық округі) марапатталса, «Үздік ойыншы» номинациясына Темірлан Қайрушев (№3 ЖОББМ) ие болды.
Жарыстың жүлделі орындарға ие болған спортшылары аудандық «Jastar» спорт клубының дипломдарымен, медальдарымен және сыйлықтарымен марапатталды.
«Жаңарған өңір»,
Жаңақала ауданы
