Сырым ауданының полиция бөлімі бастығының міндетін атқарушы, полиция подполковнигі Жанболат Мурзашев ауданның жастарына Батыс Қазақстан облысы Полиция департаменті қатардағы және басшы құрамды (сержанттар мен офицерлер) ішкі істер органдарына қызметке және ҚР ІІМ жоғары оқу орындарында білім алу бойынша түсінік жұмыстарын жүргізді.
Аудандық жастармен жұмыс жөніндегі ресурстық орталығының басшысы Сәкен Муса бастаған бірқатар аудан жастары, колледж студенттері қатысқан жиында жастар тарапынан Ішкі істер министрлігінің жоғары оқу орындарына түсу үшін қойылатын пәндік және физикалық тұрғыдағы талаптар, оқуға түсуге қажетті құжаттар сияқты өзекті сауалдар қойылып, тиісінше жауап берілді.
Жанболат Жастілекұлының сөзіне сүйенсек, Қазақстан Республикасының ішкі істер министрлігінің жоғары оқу орындарына түсушілерге қойылатын негізгі талаптар:
Қазақстан Республикасының азаматтылығы, жас мөлшерінің 16-25 жас аралығында болуы, ұлттық бірыңғай тестілеуде баллдың жоғары болуы, соттылықтың болмауы, бой өлшемі қыз балаларда 160 см, ер балаларда 170 см кем болмауы қажет.
Түсінік жұмыстарынан кейін Жанболат Мурзашев жастарға Сырым аудандық полиция бөліміне шолу жасап, аға буын қызметкерлердің еңбек жолдарымен таныстырды.
Айжан Амангелдина,
Сырым ауданы
zhaikpress.kz
