Мектеп оқушыларын тасымалдауды сапалы ұйымдастыру және автокөліктерді жаңарту мақсатында аудандағы бірқатар білім ордаcына автобус берілуде. Бұл туралы Теректі аудандық білім беру бөлімінің басшысы Максим Энгелов бүй дейді:
— Балаларды қауіпсіз тасымалдау — біздің бақылауымыздағы маңызды сұрақтардың бірі және біз осы мәселені үнемі назарға ұстаймыз. Ең бастысы балаларымызға қауіпсіз, жайлы автобустармен қатынауға жағдай жасау міндетіміз. Ауылдардағы мектеп автобустарын кезең-кезеңімен жаңартамыз. Қазірдің өзінде бірнеше ауылға жеткізіліп, таратылып жатыр. Мәселен, өткенде Федоров, Ақсуат, Подстепныйға, ал жақында Ақжайық, Шаған, Приречный, Госплемстанция мектептеріне автобус берілді. Алдағы уақытта бұл игі іс жалғасын табады, — дейді ауданның бас ұстазы.
Сонымен су жаңа автобус алған Госплемстанция жалпы орта білім беретін мектебінің ұжымы қуанышты жаңалықпен бөлісті.
— Автобус барлық заманауи талаптарға сай. Қауіпсіздік белдіктері, оқушы сөмкесіне арналған сөрелері бар. Есік ашық кезде қозғалысты тежейтін механизмі де қарастырылған. Бақылау бейне құрылғыларымен жабдықталған , мүмкіндігі шектеулі балаларға арналған арнайы көтергіштер бар. Одан бөлек, 60 км/сағ жылдамдықты шектегішпен жабдықталған. Балалардың қауіпсіздігі толық қамтамасыз етілген, — дейді аталмыш мектептің директоры Гүлдариға Амандыкова.
Айта кетейік, бүгінгі таңда бұл алтын ұяда 112 бала білім нәрімен сусындауда. Оның 42-сі Барбастау ауылынан қатынап оқиды.
Самал Жамет,
Теректі ауданы
zhaikpress.kz
