"Қадыр оқулары" облыстық байқауының аудандық білім беру мекемелері арасындағы іріктеу кезеңі өтті. Үш бағыт бойынша 40 мұғалім бақ сынасқан байқауды облыстық кәсіподақ ұйымы ұйымдастарды.
"Сөзім барда - өзім бар" бөлімінде қатысушылар ақынның өлеңдерін мүдірмей, мәнеріне келтіріп жатқа айтты. Қорытындысында Ғ.Абдуллин атындағы жалпы білім беретін орта мектебінің қазақ тілі мен әдебиеті пәнінің мұғалімі Тәрбие Тілебалиева бас жүлдемен жеңіс тұғырынан көрінді. Т.Жароков атындағы жалпы білім беретін орта мектебінің тарих пәнінің мұғалімі Меңдібек Сырымов І орынды, А.Оразбаева атындағы негізгі орта мектебінің қазақ тілі мен әдебиеті пәнінің мұғалімі Айдана Сырымова ІІ орынды, Т.Жароков атындағы жалпы білім беретін орта мектебінің қазақ тілі мен әдебиеті пәнінің мұғалімі Ақманар Рахметова ІІ орынды, Т.Жароков атындағы жалпы білім беретін орта мектебінің орыс тілі мен әдебиеті пәнінің мұғалімі Заманбек Ералиев ІІІ орынды, Тегісшіл негізгі орта мектебінің ағылшын тілі пәнінің мұғалімі Кәмшат Қуанғалиева ІІІ орынды еншіледі. Ал екінші кезеңнің атауы "Болу үшін жаралғам туған жердің жырауы" деп аталды. Аталмыш бөлімде Қадыр Мырза Әлінің сөзіне жазылған әндерді орындады.
Әуелете ән шырқап М.Ықсанов атындағы мектеп-балабақша кешенінің қазақ тілі мен әдебиеті пәнінің мұғалімі Альфия Қарағұлова бас жүлде иеленсе, Ө.Сахипов атындағы жалпы білім беретін орта мектебінің музыка пәнінің мұғалімі Үміт Өтебалиева І орынды қанжығасына байлады. Жүлделі ІІ орынды №1 мектеп-лицейінің мұғалімі Ләйлім Қамашева мен Х.Халиуллин атындағы жалпы білім беретін орта мектебінің музыка пәнінің мұғалімі Ақынбек Мұратов өзара бөліссе, Тегісшіл негізгі орта мектебінің музыка пәнінің мұғалімі Эльмира Мұратова мен Е.Ниетқалиев атындағы жалпы білім беретін орта мектебінің музыка пәнінің мұғалімі Гүлжайнар Сариева ІІІ орынды місе тұтты.
Келесі үшінші кезең "Өлең жаздым тоғыз тарау, жеті өрім" бағыты бойынша жалғасын тапты. Жас ақындар өз арнауларын арнап, нәтижесінде №1 мектеп-лицейінің қазақ тілі мен әдебиеті пәнінің мұғалімі Аида Қожасова бас жүлде, Ө.Сахипов атындағы жалпы білім беретін орта мектебінің қазақ тілі мен әдебиеті пәнінің мұғалімі Кәкима Әліпқалиева І орын, Ғ.Абдуллин атындағы жалпы білім беретін орта мектебінің қазақ тілі мен әдебиеті пәнінің мұғалімі Еркебұлан Забихоллин мен Ұзынкөл жалпы білім беретін орта мектебінің мұғалімі Біржан Мұхтаров ІІ орын, А.Оразбаева атындағы негізгі орта мектебінің қазақ тілі мен әдебиеті пәнінің мұғалімі Ақмарал Ақтарова және Т.Жароков атындағы жалпы білім беретін орта мектебінің қазақ тілі мен әдебиеті пәнінің мұғалімі Гүлфариза Доқпанова ІІІ орындарға ие болды. Барлық қатысушыларға ұйымдастырушылар тарапынан арнайы дипломдармен қатар естелік сыйлықтар табысталды. Оқ бойы озық шығып, жеңіс тұғырынан көрінген дарындар облыстық кезеңге жолдама алды.
Ақтілек Әлібекұлы,
Жәнібек ауданы
zhaikpress.kz
