Бүгін Жәнібек аудандық мәдениет үйінде "Балдәурен" балалар шығармашылық фестивалі өтіп, жас бүлдіршіндер өнерлерін паш етті. Көздің жауын алған безендірулер, ерекше сахналық киімдегі қатысушылар көрермендерге ұмытылмас көңіл күй сыйлады деуге болады. Түрлі мултьфильмдегі кейіпкерлер қонақ болып, байқау қатысушыларына шабыт беріп, ерекше әсер қалдырды.
Кеш тізгінін алған ауданымыздың талантты жүргізушісі Анаргүл Молдашеваның жанынан кішкентай Ералы Темірболат пен Айару Ержан табылды. Қымсынбай, қылықты үндерімен сахна шымылдығын ашып, алғашқы сөз кезегін аудандық мәдениет, тілдерді дамыту, дене шынықтыру және спорт бөлімінің басшысы Алтай Бақтығалиевке берді. Содан соң ауданның әншісі Райымбек Кәрімов шәкірттерімен ән шырқап, ұстаз бен оқушының сабақтастығын көрсетті.
Әуезді әндер мен құлақ құрышын қандырған күйлер, саусақтары майысқан бишілер, қылқалам мен қаламды сырлас тұтқан суретшілер мен ақындар Жәнібектің болашағы жарқын екенін көрсетті. Халықтық музыка, аспапта ойнау, хореография, домбырада ән салу, сурет өнері мен поэзия жанрында бақ сынаған оқушылардың тазалыққа, мәдениет пен өнерге құмартқаны қуантты.
Бірінен бірі өткен балғындардың өнеріне соғылған қошеметтен мәдениет үйінің іші дүр сілкінді. Кіл мықтылардың ішінен жүзден жүйрігін анықтау әділқазы алқаларына да қиынға соқты. Бірақ кез келген сайыстың ережесінде бір ғана қатысушыны жеңімпаз деп тануы шарт.
Сайып келгенде "Сурет өнері" бойынша жүлделі 1-орынды Әлия Атай, "Поэзия" жанрында Нұрлы Сабырғали, "Хореография" үздігі "Ақмаржан" би ансамблі үздік деп танылып, "Эстрадалық вокал" бойынша Ақниет Қайрат қанжығасына байлады. Жеңіс тұғырынан көрінген сайыскерлер облыстық байқауға жолдама алды.
Дарындарына қанат бітіру негізінде жүлдегерлерге арнайы дипломдар мен бағалы сыйлықтар табысталды.
Оралхан Өтеғалиев,
Жәнібек ауданы
zhaikpress.kz
