Бөрлі ауылының №1 ЖОББ мектебінде қазақ күресінен «Бала барысы» атты аудандық турнир өтті. Жарыстың мақсаты қазақ күресінің ауданымызда дамуына атсалысу және жас спортшылардың шеберліктерін арттыру.
Турнирдің ашылу салтанатына Бөрлі ауылдық округ әкімі Әзілхан Зарифов, аудандық дене шынықтыру және спорт бөлімінің басшысы Исатай Қарабаев, аудандық білім беру бөлімінің бас маманы Лаура Маметанова, самбо күресінен ІІ дүркін Азия Чемпионы, халықаралық дәрежедегі спорт шебері, Республикалық Қазақ Барысының қатысушысы Темірлан Көлбай қатысты. Жарыстың бас төрешісі ұлттық дәрежедегі төреші Серік Қалимолла.
Жарысқа 11 команда, 35 спортшы қатысты. Қатысушылар қатарында Ақбұлақ МББК, Александров МББК, Кентүбек ЖОББМ, Қанай МББК, Приурал МББК, Пугачев МББК, Успен МББК, №1 ЖОББМ, №3 ЖОББМ, №5 ЖОББМ және Бөрлі №1 ЖОББМ. Аудандық турнирге 2008-2009, 2010-2011, 2012-2013, 2014-2015 жылы туған жасөспірімдер қатыса алады.
-Бүгін ауданымызда «Бала барысы» атты қазақ күресінен жарыс оздырылды. Бұл жарысты аудандық білім беру бөлімімен бірлесіп, мектеп командалары арасында өткізілді. Негізгі мақсатымыз ауданымызда қазақ күресін көтеру, ауылдық жерлерден болашақ әлем чемпионын шығару. Қазақ күресін әрі қарай да дамыту осы жастарымыздың қолында. Жас палуандардың арасынан Темірлан ағалары сияқты палуан шығады деп сенеміз. Споршыларымыздың барлығына сәттілік тілеймін. Әр палуан өзінің мектебінің намысын қорғап жатыр. Ауданымызда барлық спорт түрлері дамып, спортшыларымыз биік белестерден көрінеді деп үміттенеміз, - дейді аудандық дене шынықтыру және спорт бөлімінің басшысы Исатай Тастемірұлы.
Жарыстың қорытындысы бойынша Тұрсынбек Төлеген (Кеңтүбек ЖОББМ), Бекарыс Ғибатолла (Бөрлі №1 ЖОББМ), Алихан Кенжебаев (№3 ЖОББМ), Мүслім Амангелді (Бөрлі №1 ЖОББМ) төрт салмақ дәрежесінде І орын иегерлері атанды. Ал жалпы командалық есепте: Бөрлі №1 ЖОББМ І орын, №3 ЖОББМ ІІ орын, Кеңтүбек ЖОББМ ІІІ орынға ие болды.
Жеңімпаздар мен жүлдегерлер аудандық дене шынықтыру және спорт бөлімі «Ақсай» мәдени-бұқаралық, ұлттық ат спорт кешенінің тиісті дәрежелі дипломдарымен, медальдарымен және арнайы белбеумен (2008-2009 ж.т.), ақшалай сыйлықтармен және командалық есепте кубоктарымен марапатталды.
Айдана Абдрахманова,
Бөрлі ауданы
