Бүгінгі таңда әскеріміз айбынды армияға айналды. Қырағы жауынгерлеріміз шекара шебінде қас қақпай елдің тыныштығын, бейбіт өмірін күзетуде. Қарулы Күштеріміз - Тәуелсіздіктің мызғымас тұғыры, елдіктің берік қалқаны болуда. Бүгінде Қазақстан Республикасы Қарулы күштерінің құрылғанына 31 жыл толды.
Осы мерекеге орай аудандық мәдениет үйінде 7 мамыр - Отан қорғаушылар күніне арналған салтанатты шара оздырылды. Ең алдымен сахна төріне Қазақстан Республикасының көк Туы шығарылып, Әнұран шырқалды. Шыңғырлау ауданының әкімі Мұрат Өмірәлиев Отан қорғаушылар күніне арналған баяндама оқып, баршаны мерекемен шын жүректен құттықтады. Бейне-көрініс арқылы бірнеше әскери бөлімшелерден жолдаған сарбаздардың да құттықтаулары қошеметпен тыңдалды.
Сондай-ақ Отан қорғауға, елдің тыныштығын күзетуге және жас ұрпаққа патриоттық тәрбие беруде өз үлесін қосып жүрген бір топ азаматтарға, соның ішінде ауған соғысының ардагерлеріне облыс және аудан әкімінің алғыс хаттары аудан әкімі Мұрат Өміралиевтың қолымен табыс табыс етілді. Және де аудандық қорғаныс істері жөніндегі бөлімнің бастығы Қуат Ахметқалиев Таулы Қарабахта этносаралық қақтығыстарды реттеуге қатысқан ардагерлерге және Кавказ шекарасындағы ұрыс қимылдарына қатысушыларға «Әскери бауырластық» төсбелгісін табыс етті. Бұл күні Қарулы Күштер қатарында қызмет етіп жүрген бір топ сарбаздардың да ата-аналарына құрмет көрсетіліп гүл және алғыс хатпен марапатталды.
Салтанатты шара аудан көркемөнерпаздары және бүлдіршіндер қатысқан мерекелік концертке ұласты.
А.Муса,
Шыңғырлау ауданы
zhaikpress.kz
