Газет оқу — зиялылықтың белгісі. Ахмет Байтұрсыновтың «Газет — халықтың көзі, құлағы һәм тілі» деген сөзі бүгін де өзектілігін жойған жоқ. Қазір айтылған ақпарат көзді ашып-жұмғанша сол мезетте-ақ әлеуметтік желілер арқылы әлемге тарап жатады. Бірақ газет оқу мәдениеті — қашанда талғамы жоғары оқырманның талабы. Шынайы ақпарат. Байыпты сараптама. Нақты тұжырым. Таңбаланған тарих. Секунд сайын жаңарып тұратын сайттардан газетті айрықшалап тұратын негізгі басымдық – осы. Қазіргі таңда баспасөзге жазылу науқаны жүріп жатыр. Осы орайда аудан әкімі Әлия Мұханбетжанова газетке қолдау білдірді.
Облыстық «Орал өңірі» және ауданымыздың төл басылымы «Теректі жаңалығы-Теректинская новь» газетіне жазылып қана қоймай,өз атынан 10 жанұяға газет жаздырып берді.
— Баспасөзге жазылу – басты назарда. БАҚ арқылы өңірдегі болып жатқан жаңалықтарды оқып, біліп отырамыз. Барлық бөлім басшылары мен округ әкімдері бұл бастаманы қолдайды деп сенемін және басылымдарға жазылуға шақырамын,- деді аудан әкімі.
Балнұр Қанаева,
Теректі ауданы
zhaikpress.kz
