Бүгін Жаңақала ауданына Қазақстанның еңбек сіңірген қайраткері, «Алаш» Халықаралық әдеби сыйлығының иегері, Батыс Қазақстан облысының құрметті азаматы, Құрмет орденінің иегері, Жайықтың ақ шағаласы атанған ақын Ақұштап Бақтыгереева және "Айқын" газетінің бас редакторының орынбасары Гүлзина Бектас, "Айқын" сайтының журналисті Анар Қоныс келді.
Қонақтарды алдымен Мәмен, Тұяқберді күйшілердің кесенесінен қарсы алып, бауырсақ пен ақ ұсынды. Дарабоз күйшілердің рухына арнап құран бағыштады.
Содан соң Рухани орталық ғимаратына келіп, қазақтың ұлы тұлғасы Абай Құнанбаевтың ескерткішіне гүл шоғын қойды.
Одан әрі аудандық орталықтандырылған кітапхана жүйесінің ұйымдастыруымен ұстаздар, жастар, ақынның оқырмандары қатысқан мағыналы да мәнді әдемі кездесу кеші өтті.
Қ.Жантілеуов музыка мектебінің домбыра сыныбының оқушылары күмбірлете күй тартып, көрермен ықыласына бөленді.
Одан соң "Өмір-керуен, өлең-өзен" атты ақынның шығармашылығына арналған кітап көрмені тамашалады.
Нұргүл Елтайқызы,
Жаңақала ауданы
zhaikpress.kz
