Теректі ауданының әкімі Әлия Мұханбетжанова ауданның бір топ жас өнерпаздарын қабылдады.
Олардың қатарында үлгілі «Жұлдыз» би ансамблі, үлгілі «Өркен» вокалдық тобының мүшесі Айсезім Тілекқабыл, жас әншілер Бейбарыс, Сұлтан, Томирис Ғарифуллиндер болды.
Өнерімен Теректіні алыс-жақын жерге танытып жүрген өнерпаз балалар алдағы уақытта халықаралық деңгейдегі байқауларда ел намысын қорғайды.
Күні кеше Ақтау қаласында өткен «Jas-tolqyn» өнер байқауында Бас жүлде алған үлгілі «Жұлдыз» би ансамблі қаңтар айында Мәскеу қаласында өтетін халықаралық байқауға жолдама алды.
Атырау қаласында дәстүрлі ұйымдастырылатын «Almaty Fest» фестивалінде Бас жүлдені жеңіп алған жез таңдай Айсезім Тілекқабыл енді Македонияға барып, бағын сынайды.
Өнерлі жанұяның балалары - Бейбарыс, Сұлтан, Томирис Ғарифуллиндер «Қазақстан дауысы. Балалар» жобасына қатысып, жалпақ елге танылды.
Бас жүлделі өспірімдердің ұстаздары - би ұжымы жетекшісі Жанар Тайшыбаева мен вокалды ансамбль жетекшісі Гүлназ Құсайнова байқау кезіндегі әсерлерімен бөлісті. Талапты шәкірттерінің жетістіктеріне қолдау білдірген аудан басшылығына алғыс айтып, алдағы үлкен додаға дайындық-жоспарларын да жария етті.
Өнерлі өрендердің қуанышына ортақтасқан аудан әкімі Әлия Биғазықызы:
- Жұлдызды жеңімпаздарды кезекті жеңісімен құттықтаймыз. Сіздердің болашақтарыңнан үлкен үміт күтемін. Алдағы үлкен сайыста сәттілік тілеймін. Әр елдің мықтылары жиналатын халықаралық өнер додасына қатысудың өзі мықтылық. Сіздерді дайындаған ұстаздарыңызға өз алғысымды білдіремін, дами беріңіздер,- деп ақ тілегін білдірді.
Қабылдау соңында аудан басшысы өнерпаз балалар мен ұстаздарына естелік сыйлықтар тартып, гүл шоқтарын табыс етті.
Жауһар Нұрым,
Теректі ауданы
zhaikpress.kz
